Qazaqstanda bir táýlikte naızaǵaı saldarynan 55 orman órti shyqty
ASTANA. KAZINFORM — Qazaqstannyń birneshe óńirinde bir táýliktiń ishinde naızaǵaı razrıadtarynan 55 orman órti tirkeldi. Órt oshaqtary 20 shilde kúni memlekettik orman qory aýmaǵynda paıda bolǵan.
Ekologııa jáne tabıǵı resýrstar mınıstrligi málimetinshe, buǵan elimizdiń aýmaǵynan ótken naızaǵaıly front sebep bolǵan. Tabıǵı qubylys saldarynan naızaǵaı soqqylary kóptegen aýmaqta bir mezette órt shyǵýyna ákelgen.
Órtterdiń basym bóligi «Semeı ormany» memlekettik orman tabıǵı rezervatynyń aýmaǵynda tirkelgen — 41 jaǵdaı. Sonymen qatar «Ertis ormany» MOTR-da — 9, Shyǵys Qazaqstan oblysynda — 3, «Naýryzym» memlekettik tabıǵı qoryǵynda jáne «Baıanaýyl» memlekettik ulttyq tabıǵı parkinde bir-birden orman órti bolǵan.
Vedomstvonyń málimetinshe, qysqa ýaqyt ishinde ondaǵan órt oshaǵynyń paıda bolýy orman kúzeti qyzmetkerlerine úlken synaq bolǵan. Degenmen jedel áreket etý men úılesimdi jumystyń arqasynda barlyq órt der kezinde anyqtalyp, oqshaýlanǵan jáne tolyq sóndirilgen nemese baqylaýǵa alynǵan.
Órtti joıý jumystaryna Tótenshe jaǵdaılar mınıstrliginiń bólimsheleri, jergilikti atqarýshy organdar jáne azamattyq qorǵaý qyzmetteri jumyldyrylǵan.
— Bir mezette birneshe órt oshaǵynyń paıda bolýyna qaramastan, mamandardyń úılesimdi is-qımyly iri orman órtteriniń taralýyna jol bermedi, — dep habarlady mınıstrlik.
Eske salaıyq, buǵan deıin Aqtóbe, Aqmola jáne Shyǵys Qazaqstan oblystaryndaǵy orman órtteri tolyq sóndirilgenin habarlaǵanbyz.
