Qazaqstanda bir táýlikte 5 orman órti tirkeldi
ASTANA. KAZINFORM – 28 tamyzda Qazaqstan aýmaǵynda 5 orman órti tirkeldi. Bul týraly QR Ekologııa jáne tabıǵı resýrstar mınıstrligi habarlady.
Vedomstvo málimetinshe, Aqmola oblysynda – 3, Qarqaraly memlekettik ulttyq tabıǵı parkinde – 1 jáne Ulytaý memlekettik ulttyq tabıǵı parkinde 1 órt oshaǵy anyqtalǵan.
Órt oshaqtary áýe patrýldeýi, arnaıy erte anyqtaý quraldary jáne memlekettik orman kúzetiniń kúndelikti monıtorıngi barysynda anyqtaldy.
– Oqıǵa oryndarynda órtti toqtatý jáne onyń aýmaǵyn shekteý úshin qajetti mamandar men tehnıka jumyldyryldy. Jumystarǵa memlekettik orman kúzetimen qatar, «Qazavıaormanqorǵaý» RMQK-nyń áýe órt sóndirý bólimsheleri, avıatsııalyq tehnıkasy jáne arnaıy quraldary qatysýda, – delingen mınıstrlik habarlamasynda.
Qabyldanǵan jedel sharalardyń nátıjesinde jalynnyń jaqyn mańdaǵy eldi mekender men orman alqaptaryna taralý qaýpine jol berilmedi.
Qazirgi ýaqytta mamandar órt oshaqtaryndaǵy jaǵdaıdy turaqtandyrý, órtti tolyq sóndirý jáne qaýipsizdikti qamtamasyz etý jumystaryn jalǵastyryp jatyr. Jaǵdaı turaqty baqylaýda.
Aıta keteıik, ShQO mektepterinde órt qaýipsizdigi talaptaryn buzýdyń 2400-ge jýyq faktisi tirkeldi.
