Qazaqstanda bir kúnde eki orman órti tirkeldi
ASTANA. KAZINFORM – 2026 jylǵy 28 qazanda memlekettik orman qory aýmaǵynda eki órt tirkeldi. Onyń biri Qostanaı oblysynda, ekinshisi Іle-Alataýy memlekettik ulttyq tabıǵı parkinde bolǵan. Bul týraly Ekologııa mınıstrligi málim etti.
Tıisti qyzmetterdiń jedel áreket etýiniń arqasynda órt oshaqtary qysqa ýaqyt ishinde oqshaýlanyp, tolyq sóndirildi. Órtti aýyzdyqtaýǵa memlekettik orman kúzeti men Tótenshe jaǵdaılar mınıstrliginiń qyzmetkerleri jáne qajetti tehnıka jumyldyryldy.
Qazir órt qaýpiniń aldyn alý maqsatynda orman kúzeti men «Qazavıaormanqorǵaý» qyzmetkerleri jerústi jáne áýe patrýldeý jumystaryn jalǵastyryp jatyr.
Mamandar azamattardy órt qaýipsizdigi talaptaryn qatań saqtap, orman órtteriniń aldyn alýǵa jaýapkershilikpen qaraýǵa shaqyrdy.
Buǵan deıin Abaı oblysy Maqanshy aýdanynda, Qabanbaı aýyldyq okrýginiń Uzynbulaq ýchaskesinde eldi mekennen 22 shaqyrym qashyqtyqta batpaqty jerdegi ashyq aýmaqta qurǵaq shóp pen qamys órtengen bolatyn.
