Qazaqstanda bir kúnde bes orman órti tirkeldi
ASTANA. KAZINFORM – 28 qyrkúıektegi jaǵdaı boıynsha Qazaqstannyń memlekettik orman qory aýmaǵynda bes orman órti tirkeldi, dep habarlaıdy Ekologııa jáne tabıǵı resýrstar mınıstrligi.
Vedomstvo málimetinshe, Jetisý oblysynda bir, Qostanaı oblysynda eki órt shyqqan. Sondaı-aq «Kókshetaý» memlekettik ulttyq tabıǵı parkinde jáne «Іle-Alataý» memlekettik ulttyq tabıǵı parkinde bir-bir órt oshaǵy tirkeldi.
Órt oshaqtary memlekettik orman kúzetiniń jerústi patrýldeýi jáne erte anyqtaý júıeleri arqyly der kezinde anyqtalǵan.
– Órt tirkelgen sátten bastap orman kúzetiniń qyzmetkerleri, qajetti kúshter men arnaıy tehnıka jedel jumyldyryldy. «Kazavıaormanqorǵaý» RMQK-nyń sý tógý qurylǵysymen jabdyqtalǵan tikushaǵynyń qatysýymen órtti oqshaýlaý jáne tolyq sóndirý jumystary júrgizildi, – delingen habarlamada.
Vedomstvonyń málimetinshe, órttiń odan ári taralýyna jol bermeý úshin barlyq qajetti shara qabyldanǵan. Qazirgi ýaqytta jaǵdaı turaqty baqylaýda.
Órt qaýpi joǵary kezeńde azamattarǵa tabıǵat aıasynda demalǵan kezde órt qaýipsizdigi talaptaryn qatań saqtaý qajettigi eskertildi.
Aıta keteıik, keshe eki orman órti tirkelgen bolatyn.
