Qazaqstanda bir kúnde bes orman órti tirkeldi
ASTANA. KAZINFORM — 25 tamyzda Qazaqstan boıynsha bes orman órti tirkeldi. Órtterdiń ekeýi Batys Qazaqstan oblysynda, qalǵandary «Semeı ormany» MOTR, «Balqash» memlekettik tabıǵı rezervaty jáne «Kókshetaý» memlekettik ulttyq tabıǵı parkinde boldy.
Ekologııa jáne tabıǵı resýrstar mınıstrliginiń baspasóz qyzmetiniń málimetinshe, qazir órt oshaqtarynda orman sharýashylyǵy qyzmetkerleri men «Qazavıaormanqorǵaý» mamandary jumys istep jatyr. Mamandar órtti oqshaýlap, onyń jaqyn aýmaqtarǵa taralýyna jáne qaıta tutanýyna jol bermeý sharalaryn júrgizýde.
— Orman aýmaqtaryndaǵy órt qaýipsizdigi áýe jáne jerústi patrýldeý arqyly turaqty baqylaýda. Órt belgileri anyqtalǵan jaǵdaıda qajetti kúshter men tehnıka dereý oqıǵa ornyna jiberiledi, — delingen taratylǵan aqparatta.
Mamandar turǵyndar men tabıǵat aıasynda demalýshylardy órt qaýipsizdigi talaptaryn qatań saqtaýǵa shaqyrdy. Tabıǵatta ot jaqqan kezde ony qaraýsyz qaldyrmaı, demalys ornynan keter aldynda tolyq sóngenine kóz jetkizý qajet.
Budan buryn Almatyda 16 qabatty turǵyn úıden órt shyǵyp, 127 adam qutqarylǵanyn jazdyq.
