Qazaqstanda bir kúnde 54 áıelden sút bezi obyryna kúdik anyqtaldy
ASTANA. KAZINFORM – Qazaqstanda «Qyzǵylt qazan» halyqaralyq aqparattyq naýqany aıasynda ótken Biryńǵaı ashyq esik kúninde 54 áıelden qaterli isikke kúdik týdyratyn belgiler anyqtaldy, dep habarlaıdy Densaýlyq saqtaý mınıstrligi.
31 qazanda elimizde sút bezi obyrynyń aldyn alý jáne ony erte anyqtaýǵa arnalǵan profılaktıkalyq aktsııa uıymdastyryldy. Onyń maqsaty – áıelderdiń onkologııalyq aýrýlardy ýaqytyly dıagnostıkalaýdyń mańyzdylyǵy týraly habardarlyǵyn arttyrý.
Aktsııa barysynda 2 198 áıel dárigerlerdiń keńesin aldy. Tekserý nátıjesinde 54 áıelden qaterli isikke kúdik týdyratyn belgiler, 180 áıelden obyr aldy jaǵdaılar anyqtaldy. Taǵy 1 618 áıelden basqa da aýrýlar tabyldy.
Biryńǵaı ashyq esik kúni aıasynda barlyǵy 1 679 dıagnostıkalyq zertteý júrgizildi. Olardyń qatarynda mammografııa, sút bezderiniń ýltradybystyq zertteýi jáne basqa da tekserýler bar.
– Mundaı profılaktıkalyq is-sharalardyń basty mańyzy — uzaq ýaqyt boıy eshqandaı belgisiz ótýi múmkin patologııalyq ózgeristerdi ýaqtyly anyqtaý. Sonymen qatar qaterli isikke kúdik anyqtalýy onkologııalyq dıagnozdyń rastalǵanyn bildirmeıdi jáne qosymsha tekserýdi qajet etedi. Sút bezi obyry Qazaqstandaǵy áıelder arasynda eń kóp taralǵan onkologııalyq aýrýlardyń biri bolyp qala beredi. Aýrýdy erte satysynda anyqtaý tıimdi em júrgizý jáne patsıentterdiń ómir súrý sapasyn saqtaý múmkindigin edáýir arttyrady, – delingen aqparatta.
Aktsııaǵa qatysqan áıelder beıindi mamandarǵa qaralyp, medıtsınalyq kórsetilimder boıynsha qajetti tekserýlerden ótti. Sondaı-aq olarǵa densaýlyq jaǵdaıyn odan ári baqylaýǵa qatysty usynymdar berildi.
Mamandar sút bezi obyrynyń bastapqy kezeńderinde aıqyn belgiler baıqalmaýy múmkin ekenin eskertedi. Sondyqtan shaǵym bolmaǵan jaǵdaıda da jas ereksheligi men medıtsınalyq usynymdarǵa sáıkes profılaktıkalyq tekserýlerden jáne skrınıngterden turaqty ótip turý mańyzdy.
Dárigerlerdiń aıtýynsha, aýrýdy erte anyqtaý emdeýdiń tıimdiligin arttyryp, patsıentterdiń ómir súrý sapasyn saqtaýǵa múmkindik beredi.
Aıta keteıik, 2025 jyly «Qyzǵylt qazan» respýblıkalyq aktsııasy aıasynda 8 myńnan astam áıel sút bezi obyryn erte anyqtaýǵa arnalǵan tekserýden ótken edi. Aktsııaǵa elimizdiń 20 óńirlik onkologııalyq ortalyǵy qatysqan.