Qazaqstanda bir kúnde 4 orman órti tirkeldi
ASTANA. KAZINFORM – 9 qyrkúıekte Qazaqstannyń memlekettik orman qory aýmaǵynda tórt orman órti tirkeldi, dep habarlaıdy Ekologııa jáne tabıǵı resýrstar mınıstrligi.
Órt oshaqtary Aqmola jáne Soltústik Qazaqstan oblystarynda, sondaı-aq Qarqaraly memlekettik ulttyq tabıǵı parki men «Semeı ormany» memlekettik orman tabıǵı rezervatynda anyqtalǵan.
Órt oshaqtaryn «Qazavıaormanqorǵaý» RMQK-nyń áýe jáne orman kúzeti jerústi patrýldeýi barysynda anyqtady.
Aqparat túsken sátten bastap órtti sóndirýge qajetti kúshter men quraldar jumyldyrylǵan.
– Órtti sóndirýge «Qazavıaormanqorǵaý» RMQK tikushaqtary, memlekettik orman kúzetiniń jáne Tótenshe jaǵdaılar departamentiniń qyzmetkerleri qatysty. Mamandar órttiń odan ári taralýyna jol bermedi. Úılesimdi is-qımyldyń nátıjesinde órt oshaqtary jedel oqshaýlandy. Qazirgi ýaqytta birqatar óńirde órtti tolyq sóndirý jumystary jalǵasyp jatyr, – delingen aqparatta.
Jaǵdaı turaqty baqylaýǵa alynǵan.
Aıta keteıik, Qostanaı oblysynda 600 gektar aýmaqty sharpyǵan órt sóndirildi.
