Qazaqstanda bir kúnde 4 orman órti tirkeldi
ASTANA. KAZINFORM – 10 shilde kúni Qazaqstannyń memlekettik orman qory aýmaǵynda 4 orman órti tirkeldi.
Ekologııa mamandarynyń málimetinshe, órt derekteri Pavlodar oblysynda, Katonqaraǵaı ulttyq tabıǵı parkinde, «Semeı ormany» memlekettik orman tabıǵı rezervatynda jáne «Jasyl Aımaq» respýblıkalyq memlekettik kásiporny aýmaǵynda anyqtalǵan.
– Órt oshaqtary «Qazavıaormanqorǵaý» RMQK-nyń áýe patrýldeýi barysynda jáne erte anyqtaý júıeleri arqyly belgili boldy. Orman kúzeti men áýe órt sóndirý desanttary qysqa ýaqyt ishinde oqshaýlaý jumystaryna kiristi. Arnaıy tehnıka men tikushaq jumyldyrylyp, nátıjesinde órt oshaqtary aýmaqqa taralý qaýpinsiz jedel sóndirildi, – dep habarlady vedomstvodan.
Mamandar respýblıka boıynsha aptap ystyq kútilýine baılanysty órt qaýipti kezeńde tabıǵat aıasynda demalýshylardy qaýipsizdik talaptaryn qatań saqtaýǵa shaqyrdy.
– Orman – barshamyzǵa ortaq baılyq. Ony saqtaý – ár azamattyń jaýapkershiligi, – dep atap ótti mamandar.
Aıta keteıik, Astanadaǵy qoqys polıgonynan órt shyqty.
