Qazaqstanda bir kúnde 10 orman órti tirkeldi
ASTANA. KAZINFORM – 14 tamyzda Qazaqstannyń orman qory aýmaǵynda 10 orman órti tirkeldi, dep habarlaıdy Ekologııa jáne tabıǵı resýrstar mınıstrligi.
Óńirler boıynsha Pavlodar oblysynda – 1, «Ertis ormany» memlekettik orman tabıǵı rezervatynda – 7, «Semeı ormany» rezervatynda – 1, Qarqaraly memlekettik orman tabıǵı rezervatynda 1 órt tirkelgen.
Órt oshaqtary «Qazavıaormanqorǵaý» RMQK júrgizetin áýe patrýldeýi, erte anyqtaý júıeleri jáne memlekettik orman kúzetiniń turaqty baqylaýy nátıjesinde der kezinde anyqtaldy.
Órtterdi sóndirýge memlekettik orman kúzetiniń qyzmetkerleri, «Qazavıaormanqorǵaý» RMQK órt sóndirý desanttary, tikushaqtar men arnaıy tehnıka, sondaı-aq ózara is-qımyl tártibimen basqa da kúshter men quraldar tartyldy.
– Qabyldanǵan jedel sharalardyń nátıjesinde órttiń eldi mekender men orman alqaptaryna taralýyna jol berilmedi. Qazirgi ýaqytta órt oshaqtaryn oqshaýlaý jáne tolyq sóndirý jumystary júrgizilýde. Jaǵdaı turaqty baqylaýda, – delingen mınıstrlik habarlamasynda.
Vedomstvo órt qaýpi joǵary kezeńde azamattardy órt qaýipsizdigi talaptaryn qatań saqtaýǵa jáne tabıǵat aıasynda barynsha saq bolýǵa shaqyrdy.
Aıta keteıik, Ertis-Baıan óńirinde orman órtteri 25 %-ǵa kóbeıgen.
