Qazaqstanda bir kisige satylatyn SIM kartanyń sany shektelýi múmkin be

ASTANA. KAZINFORM – Búgin Parlament Májilisinde kıberqylmyspen kúres taqyrybyna arnalǵan talqylaýda elimizde bir kisige satylatyn SIM kartanyń sanyn shekteý usynyldy.

«Pavlodar oblystyq polıtsııa departamenti ókilderimen kezdesken edik. Olar SIM-karta (uıaly telefon nómirleri) berýdi shekteý kerek dep usynys aıtty. Bizdiń qoǵamda ony kez kelgen dúkennen satyp alýǵa bolady. Bir kisige sheksiz kóp SIM-kartany satý múmkindigi bar. Keıbir elderdiń tájirıbesine qarasaq, tek baılanys operatorynyń fılıalynan satyp alýǵa ruqsat etiledi. Jekelegen dúkender muny sata bermeıdi. Osyǵan shekteý qoısańyzdar. Bir kisige kem degende 2-3 SIM kartadan artyq berilmese. Bul úlken kómek bolady dep otyr polıtseıler. Osy máseleni zań júzinde qarastyrýǵa bola ma?» - dep surady Májilis depýtaty Jarqynbek Amantaıuly. 

Óz kezeginde Tsıfrlyq damý, ınnovatsııalar jáne aeroǵarysh ónerkásibi mınıstrligi aqparattyq qaýipsizdik komıtetiniń tóraǵasy Rýslan Ábdiqalyqov SIM-kartalarynyń sanyna shekteý kerek emes ekenin aıtyp, onyń ornyna abonentti sáıkestendirý tetigin engizýdi usyndy. 

«Óıtkeni shekteý bolǵan kezde, bes SIM kartadan turatyn kvotasyn basqa bireýge qaıta satatyn adamdar paıda bolýy múmkin. Sondyqtan memleket jaǵynan qajetsiz shekteýler bolmas úshin adamdarǵa ıdentıfıkatsııa jasap, sodan keıin ǵana SIM kartany iske qosýdy usynamyz. Bul usynys qazir qarastyrylyp jatyr», - dedi R. Ábdiqalyqov.