Qazaqstanda bir qolǵa beriletin SIM-karta sanyn shekteıtin zań ázirlenip jatyr

ASTANA. KAZINFORM — Búginde Qazaqstanda jasalatyn qylmystardyń 34%-y alaıaqtyq baǵytynda. Onyń teń jartysy — ınternet-alaıaqtyq.

Bul týraly Bas prokýrordyń birinshi orynbasary Tımýr Táshimbaev «QazAqparat» halyqaralyq aqparat agenttigine bergen suhbatynda aıtty.

— Bas prokýratýra baılanys operatorlarymen birlesip, «Sim-Box» jabdyǵyn anyqtaý ádistemesin ázirledi. Byltyr osyndaı 78 qurylǵy jáne zańsyz paıdalanylǵan 50 myńnan astam SIM-karta tárkilendi. Al, bıyl shamamen taǵy 30 myń nómir anyqtaldy, — dedi Tımýr Táshimbaev.

Qazirgi tańda naryqta abonenttik nómirlerdiń sany óte kóp, kez kelgen adam olardy shekteýsiz satyp ala alady, tipti keıbir dúkender taýar alǵan kezde tegin taratady. Sondyqtan olardy baqylaý ońaıǵa soqpaı tur.

— Ókinishke qaraı, bul másele retteýdi qajet etedi. Qazirgi tańda bul retteý júzege asyrylyp keledi. Májiliste bir qolǵa beriletin SIM-kartalar sanyn shekteý máselesin qamtıtyn zań jobasy qarastyrylyp jatyr. Onda 10 nemese 5 SIM-karta syndy ártúrli nusqalar usynyldy. Sonymen birge, nesıe alý protsesine uqsas túrde SIM-kartany tirkeý kezinde beınetekserýdi engizý usynyldy, — deıdi Bas prokýrordyń birinshi orynbasary.

Ótken jyly Tsıfrlyq damý, ınnovatsııalar jáne aeroǵarysh ónerkásibi mınıstrligi ár adamǵa SIM-karta sanyn shekteý týraly pikir bildirgen edi.