Qazaqstanda bir gramm altyn qansha turady

ASTANA. KAZINFORM — Baǵaly metaldyń baǵasy bir aptada ósti.  

Ulttyq banktiń málimetine sáıkes, 26 aqpan tańerteńgi jaǵdaı boıynsha bir gramm altynnyń baǵasy 82 542,16 teńgeni qurady.

Bir apta buryn baǵa 77 543,67 teńge bolǵan. 

Álemdik altyn naryǵynda da baǵanyń ósýi baıqalyp otyr. Reuters agenttiginiń málimetinshe, 25 aqpandaǵy jaǵdaı boıynsha altynnyń spot baǵasy 1,1%-ǵa ósip, ýntsııasyna 5 202,28 AQSh dollaryn qurady, al AQSh-tyń sáýir aıyndaǵy fıýchersteri shamamen 1%-ǵa ósip, 5 226,20 dollar boldy. Jyl basynan beri metall shamamen 20%-ǵa qymbattaǵan.

Altyn baǵasy AQSh saýda tarıfteri ınflıatsııany jedeldetýi múmkin degen alańdaýshylyqqa baılanysty qaýipsiz aktıvterge degen suranystyń artýy aıasynda ósip keledi. Iran men AQSh arasyndaǵy shıelenis jáne jalǵasyp jatqan geosaıası táýekelder baǵa belgileýge qosymsha qoldaý kórsetip otyr. 

Bank of America taldaýshylary kóktemde qysqa merzimdi túzetý bolýy múmkin ekenine qaramastan aldaǵy 12 aıda baǵa ýntsııasyna 6 myń dollarǵa jetedi dep shamalap otyr.

Eske sala ketsek, qańtarda elimizde altynnyń bir gramy 82 164.45 teńgege baǵalandy.