Qazaqstanda bir gramm altyn baǵasy qansha

ASTANA. KAZINFORM – Qazaqstanda altyn baǵasy bir apta ishinde aıtarlyqtaı ózgergen joq.

Qazaqstan Ulttyq bankiniń 2026 jylǵy 2 sáýirdegi derekterine sáıkes, bir gramm altynnyń baǵasy 70 098,10 teńgeni qurady.

Bir apta buryn bul kórsetkish 70 647,24 teńge bolǵan. Osylaısha, baǵa sál tómendegenimen, jalpy turaqty deńgeıde saqtalyp otyr.

Baǵanyń bul dınamıkasy álemdik naryqtaǵy ózgeristermen baılanysty. Sońǵy kúnderi altyn baǵasy 1%-dan astam tómendep, birneshe kúndik ósimin toqtatty. Buǵan AQSh prezıdenti Donald Tramptyń Iranǵa qatysty málimdemeleri áser etti.

Saýda derekterine sáıkes, spot altyn 1,3%-ǵa arzandap, bir ýntsııasy 4 694 dollardy qurady. Al AQSh-taǵy fıýcherster 1,9%-ǵa tómendep, 4 723 dollarǵa deıin tústi.

Aıta keteıik, buǵan deıin Reseı 100 gramnan asatyn altyn quımalaryn elden shyǵarýǵa tyıym salǵan bolatyn.