Qazaqstanda bir apta ishinde áleýmettik mańyzy bar azyq-túlik taýarlary arzandady
ASTANA. KAZINFORM — 22 shildedegi jaǵdaı boıynsha apta ishinde elde áleýmettik mańyzy bar birqatar azyq-túlik taýary baǵasynyń tómendeýi baıqaldy, dep habarlaıdy Ulttyq statıstıka bıýrosynyń baspasóz qyzmeti.
Baǵasy eń kóp tómendegen ónim qııardyń baǵasy 4,3% arzandady.
Sonymen qatar qyryqqabat (1,5%), kartop (1,4%), qyzanaq (0,8%), alma (0,7%), pııaz (0,4%), súzbe (0,3%), kúrish, qaraqumyq jarmasy, qatty jáne jartylaı qatty irimshik, tuz (0,1%) boıynsha baǵalardyń tómendeýi baıqaldy.
Esepti aptada birinshi surypty bıdaı uny, birinshi surypty bıdaı unynan daıyndalǵan nan, sút (pasterlengen, ýltrapasterlengen, 2,2%-dan 6% deıingi maılylyqtaǵy sterıldengen sút), qaımaq jáne sary maı baǵasy ózgerissiz qaldy.
— Óńirlik bóliniste elimizdiń birqatar qalalarynda deflıatsııalyq dınamıka baıqaldy. Áleýmettik mańyzy bar azyq-túlik taýarlarynyń jalpy baǵa deńgeıi bir apta ishinde Qonaev, Óskemen jáne Taldyqorǵan qalalarynda 0,4%, Aqtóbe qalasynda 0,2%, Almaty, Aqtaý, Atyraý, Qostanaı, Qyzylorda, Oral jáne Túrkistan qalalarynda 0,1% tómendedi. Astana, Jezqazǵan, Qaraǵandy, Petropavl, Semeı jáne Taraz qalalarynda baǵalar ótken apta deńgeıinde saqtaldy, — delingen statıstıkalyq málimette.
Respýblıka boıynsha qııardyń ortasha baǵasy kılogramyna 502 teńgeni qurady. Eń tómen baǵa Taraz qalasynda tirkeldi — kılogramy 339 teńge.
Tazartylǵan kúrishtiń ortasha respýblıkalyq baǵasy kılogramyna 533 teńge deńgeıinde qalyptasty. Eń qoljetimdi baǵalar Qyzylorda qalasynda — 456 teńge jáne Aqtaý qalasynda — 472 teńge boldy.
Elimiz boıynsha kartoptyń ortasha baǵasy kılogramyna 283 teńgeni qurady. Eń tómen baǵa Túrkistan qalasynda tirkeldi — kılogramy 218 teńge.
Respýblıka boıynsha I sanattaǵy 10 jumyrtqanyń ortasha baǵasy 564 teńgeni qurady. Eń tómen baǵalar Qyzylorda qalasynda (464 teńge) jáne Oral qalasynda (471 teńge) baıqaldy.
Et ónimderi boıynsha respýblıkadaǵy ortasha baǵalar: súıekti sıyr eti — kılogramyna 3 775 teńge, taýyq eti — kılogramyna 1 758 teńge.
Osydan buryn Úkimet ishki óndiristi arttyrý arqyly azyq-túlik baǵasyn turaqtandyratynyn jazǵanbyz.
