Qazaqstanda bosqyndar lagerleri týraly kelissózder júrip jatqan joq — Aleshka Sımkıch
ASTANA.KAZINFORM — Eýropalyq odaq Qazaqstanmen bosqyndardy ustaý ortalyqtaryn qurý týraly kelissózder júrgizip jatqan joq. Bul týraly Qazaqstan Respýblıkasyndaǵy Eýropalyq odaqtyń elshisi Aleshka Sımkıch aıtty.
Elshiniń málimetinshe, Eýropalyq odaq kóshi-qon paktisin jańartty jáne onda úsh negizgi maqsat bar.
— Jańńartylǵan pakttiń úsh maqsaty bar. Olar, birinshisi — zańsyz kóshi-qonnyń aldyn alý jáne adam saýdasymen aınalysatyn qylmystyq jelilerge qarsy kúres. Ekinshisi — soǵys pen qýdalaýdan qashqan adamdardy qorǵaý. Úshinshisi — Eýropalyq odaqqa talanttardy tartý, — dedi Aleshka Sımkıch.
Sonymen qatar elshiniń aıtýynsha, buqaralyq aqparat quraldarynda keńinen aıtylǵan taǵy eki mańyzdy ózgeris bar.
— Jańa ózgeristerge sáıkes, endi EO shekarasynyń ózinde-aq baspana suraýǵa bolady. ıAǵnı EO-ǵa múshe memleketter mıgranttardy óz aýmaǵyna kirgizbeı-aq, olardyń ótinishin shekarada qabyldaı alady. Bul protsess 12 aptaǵa deıin sozylady. Odan keıin ótinish tıisti elge jiberiledi. Ekinshi másele osy qaýesetterdiń shyǵýyna sebep bolǵan jaıt. Endi EO elderi baspana suraǵan, biraq ony ala almaǵan jáne onyń aýmaǵynda qalýǵa quqyǵy joq adamdardy úshinshi elge jibere alady. ıAǵnı óz eline emes, basqa bir úshinshi elge, — dedi ol.
Aleshka Sımkıchtyń málimetinshe, bul norma áli zańnamalyq túrde tolyq bekitilmegen, biraq mundaı múmkindik qarastyrylǵan.
— Meniń oıymsha, bul qaýesetter keıbir elder jaıly boljamdar aıtylǵandyqtan paıda boldy. Bul jaı ǵana spekýlıatsııa. Kim aıtqanyn bilmeımin. Eýropalyq Odaq ta, Eýropalyq Komıssııa da qazirgi ýaqytta eshbir elmen, sonyń ishinde Qazaqstanmen de, ony «úshinshi el» retinde paıdalaný týraly kelissózder júrgizip jatqan joq. Mundaı kelissózderdi múshe memleketter ózderi júrgizedi. Olar qajet bolsa, belgili bir elge júginedi. Mysaly, Italııa men Albanııa arasynda mundaı kelisimder bar. Bolashaqta bireý Qazaqstanǵa nemese Ózbekstanǵa júginýi múmkin, biraq bul Qazaqstannyń óz sheshimi bolady. Ázirge mundaı kelissózder bolǵan joq jáne jaqyn ýaqytta da bolmaıdy, — dep túıindedi Aleshka Sımkıch.
Ol Eýropalyq odaqtyń Qazaqstan aýmaǵynda bosqyndarǵa arnalǵan lagerler qurý máselesin talqylamaıtynyn erekshe atap ótti. Mundaı sheshimder EO tarapynan birjaqty qabyldana almaıdy jáne tek tıisti memlekettiń kelisimimen ǵana júzege asýy múmkin.
Aıta keteıik EO elshisi Qazaqstandaǵy strategııalyq mańyzdy shıkizat zerthanasy týraly aıtqan edi.
