Qazaqstanda bosqyn mártebesin berý erejeleri ózgerdi
ASTANA. KAZINFORM – QR Úkimeti 2024 jylǵy 7 tamyzdaǵy qaýlysy arqyly bosqyn mártebesin berý, uzartý, qaıtaryp alý jáne toqtatý erejelerine ózgerister engizdi.
Jańa túzetýlerde bosqyn dep taný sheshimin jergilikti atqarýshy organ sheshim qabyldanǵan kúnnen bastap 5 jumys kúni ishinde tapsyratyny jazylǵan.
Bul rette, ótinim berýshi bosqyn dep taný sheshimniń kóshirmesin jibergennen keıin 3 aı ishinde jergilikti atqarýshy organǵa bosqyn kýáligin alýǵa kelmese jáne osy adamnyń ózi kórsetken mekenjaı boıynsha kelmeıtini týraly habarlama kelip tússe nemese adamnyń Qazaqstannan tys jerge ketýi týraly jáne basqa da anyq aqparat alynsa, jergilikti atqarýshy organ bosqyn mártebesin berý týraly sheshimniń kúshin joıady.
QR aýmaǵynda bosqynnyń turǵylyqty jerin aýystyrǵanda onyń jeke isiniń materıaldary bosqyndy esepke qoıýdyń jańa orny boıynsha jergilikti atqarýshy organǵa jiberiledi. Eger pana izdep júrgen adamǵa zańnyń 12-babynda kózdelgen negizderge sáıkes bosqyn mártebesin berýden bas tartý jaǵdaıynda jergilikti atqarýshy organ bas tartý týraly sheshim qabyldanǵan kúnnen bastap 5 jumys kúni ishinde bas tartý sebepterin jáne qabyldanǵan sheshimge shaǵymdaný tártibin kórsete otyryp, sheshimniń kóshirmesin osy adamǵa tabystaıdy nemese joldaıdy, oǵan qosa ýákiletti organ men ishki ister organdaryn habardar etip, qabyldanǵan sheshimniń kóshirmesin jiberedi.
Merzimdi uzartý kezinde jergilikti atqarýshy organ bosqyn kýáliginiń, turýǵa yqtııarhattyń (bar bolsa), jol júrý qujatynyń bolýyn tekseredi, otbasy jaǵdaıyndaǵy, otbasy quramyndaǵy, baratyn mekenjaıyndaǵy ózgerister týraly málimetterdi naqtylaıdy jáne bul ózgeristerdi bosqynnyń jeke isine qosady.
Bosqyn mártebesin uzartýdan bas tartylǵan jaǵdaıda jergilikti atqarýshy organ qabyldanǵan sheshimniń kóshirmesin usynyp, ýákiletti organ men ishki ister organdaryn 5 jumys kúni ishinde habardar etedi, sondaı-aq ótinim berýshige qabyldanǵan sheshim jáne bosqyn kýáligin jaramsyz dep taný týraly habarlama jiberedi.
Jergilikti atqarýshy organ bosqyn mártebesinen aıyrý týraly sheshim qabyldanǵan kúnnen bastap, 5 jumys kúninde sheshimniń sebepterin kórsetip jáne oǵan shaǵymdaný tártibin túsindirip, kóshirmesin tapsyrady nemese jiberedi, sondaı-aq ýákiletti organ men ishki ister organdaryn habardar etedi.
Qaýly 2024 jyly 20 tamyzdan bastap qoldanysqa engiziledi.
