Qazaqstanda bosqyn mártebesi bar adamdarǵa qatysty erejeler ózgerýi múmkin
ASTANA. KAZINFORM — Qazaqstan Respýblıkasy Іshki ister mınıstrligi bosqyn mártebesi bar adamdarǵa jol júrý qujattaryn berý qaǵıdalaryn jańartýdy usyndy, dep habarlaıdy Kazinform tilshisi.
Tıisti buıryq jobasy «Ashyq NQA» portalynda jarııalanǵan. Qujat Qazaqstan Respýblıkasy ІІM-niń 2021 jylǵy 5 naýryzdaǵy №134 buıryǵyna — «Memlekettik qyzmet kórsetý qaǵıdalaryn bekitý týraly» qujatqa ózgerister men tolyqtyrýlar engizýdi kózdeıdi. Atap aıtqanda, bul «Jol júrý qujatyn berý» memlekettik qyzmetine qatysty.
Ózgerister 2026 jylǵy 9 qańtarda qabyldanǵan «Tsıfrlandyrý, kólik jáne kásipkerlik máseleleri boıynsha keıbir zańnamalyq aktilerge ózgerister men tolyqtyrýlar engizý týraly» zańǵa baılanysty ázirlenip otyr. Sonymen qatar normalar Qazaqstan Respýblıkasynyń Konstıtýtsııasy men qoldanystaǵy kóshi-qon zańnamasyna sáıkestendiriledi.
Ne ózgerýi múmkin
Joba aıasynda bosqyndarǵa beriletin jáne Qazaqstan aýmaǵynan tys jerlerge shyǵýǵa múmkindik beretin jol júrý qujatyn rásimdeý tártibi naqtylanady.
Sonyń ishinde memlekettik qyzmet kórsetý tártibin tsıfrlandyrýǵa beıimdeý jáne termınologııany jańartý kózdelgen. Mysaly, «aqparattandyrý» uǵymy «tsıfrlandyrý» termınimen aýystyrylýy múmkin.
Sondaı-aq qujatta qyzmet kórsetý rásiminiń qoldanystaǵy zańnamaǵa saı naqtyraq rettelýi qarastyrylǵan.
Buryn qalaı bolǵan
2021 jylǵy ІІM buıryǵyna sáıkes, bosqyn mártebesi bar adamdarǵa jol júrý qujatyn berý standartty tártippen júzege asyrylyp kelgen. Alaıda onda tsıfrlandyrýǵa qatysty jańa tásilder men keıingi zańnamalyq ózgerister tolyq eskerilmegen.
Aıta keteıik, joba boıynsha qoǵamdyq talqylaý 2026 jylǵy 1 maýsymǵa deıin jalǵasady.
Osydan buryn QR Syrtqy ister mınıstrliginiń resmı ókili Erlan Jetibaev Taıaý Shyǵys elderinen bosqyndardy qabyldaý yqtımaldyǵyna qatysty Qazaqstannyń ustanymyn túsindirdi.
