Qazaqstanda boryshkerlerdi «Tsıfrlyq baqylaý» arqyly izdeý iske qosyldy

ASTANA. KAZINFORM – Ádilet mınıstrligi, Jeke sot oryndaýshylarynyń Respýblıkalyq palatasy jáne Bas Prokýratýra birlesip boryshkerlerdi anyqtaýdyń tetikterin damytý boıynsha «Tsıfrlyq baqylaý» júıesi múmkindikterin keńeıtken.

Qazirgi tańda Bas prokýratýranyń «Tsıfrlyq baqylaý» (tsıfrovoı nadzor) júıesi arqyly qaryzyn tóleýden jaltaryp júrgen azamattardy tek qala kósheleri men qoǵamdyq oryndarda ǵana emes, sondaı-aq áýejaılarda, temirjol jáne metro nysandarynda, áleýmettik mańyzy bar ǵımarattarda da anyqtaý múmkindigin iske qosty.

Sonymen qatar boryshkerler halyqqa qyzmet kórsetý ortalyqtarynda memlekettik qyzmetterdi alý kezinde nemese áýe jáne temirjol bıletterin satyp alý barysynda derekter bazasy arqyly avtomatty túrde bet-beıne sáıkestendirý arqyly anyqtalyp jatyr. 

Málimetterge sáıkes, 2024 jyldyń qańtar aıynan izdeýde júrgen boryshkerler sany 4 560 adamdy qurady. Onyń ishinde 2 118 tulǵanyń turǵylyqty mekenjaılary anyqtalyp, jalpy anyqtaý kórsetkishi 39,3% boldy. 

Buǵan qosa, atalǵan júıe arqyly boryshkerlerge tıym salynǵan avtokólikterdi izdestirý múmkindigin iske asyrý jumystary júrgizilýde. Bul baǵyttaǵy is-sharalar Bas prokýratýra, Ádilet mınıstrligi jáne Jeke sot oryndaýshylardyń Respýblıkalyq palatasynyń ózara yntymaqtastyǵy aıasynda júzege asyrylyp jatyr. 

Qalalyq beınebaqylaý kameralary men jasandy ıntellekt quraldarynyń kómegimen anyqtalǵan, paıdalanýǵa tıym salynǵan kólikter polıtsııa qyzmetkerleriniń qatysýymen toqtatylyp, arnaıy bekitilgen turaqtarǵa jetkiziledi. Odan ári zań talaptaryna sáıkes sot aktilerin tolyq ári ýaqtyly oryndaýdy qamtamasyz etedi. 

Atalǵan sharalar óndirip alýshylardyń quqyqtary men zańdy múddelerin qorǵaýǵa, sondaı-aq sot sheshimderiniń oryndalý tıimdiligin arttyrýǵa baǵyttalǵan.