Qazaqstanda borandy kúnderi jolǵa shyqqan júrgizýshilerge aıyppul salynýy múmkin
ASTANA. QazAqparat - Qazaqstanda borandy kúnderi qasaqana jolǵa shyǵatyn júrgizýshilerge aıyppul salý usynyldy. Bul jaıynda Tótenshe jaǵdaılardyń aldyn alý jáne olardy joıý jónindegi vedomstvoaralyq memlekettik komıssııanyń otyrysynda belgili boldy.
Jıyn barysynda QR Іshki ister mınıstriniń orynbasary Vladımır Bojko Ákimshilik polıtsııa komıtetiniń tóraǵasy Igor Lepehadan borandy kúnderi joldardyń jabylǵanyna qaramastan jolǵa shyǵatyn júrgizýshiler qatarynyń azaımaı otyrǵandyǵyn aıta kele: «Muny tyıý úshin Ákimshilik kodekske qandaı da bir ózgertýler engizý kózdelgen be?», - dep surady.
«Jalpy, bizde polıtsııa qyzmetkeriniń zańdy talabyna baǵynbaǵan jaǵdaıda qoldanylatyn shara bar. Biraq, ony qoldaný óte qıyn. Óıtkeni, eń birinshiden, júrgizýshiler ótirik aıtady. Olar jaqyn eldi mekenge baramyn dep aldap, úlken joldarǵa shyǵyp ketedi. Odan keıin úlken joldardy jaýyp tastaý múmkin emes»,- dedi I.Lepeha.
«Men birneshe oblystarda bolǵanymda: «Mundaı jaǵdaılarda bizdiń azamattarymyzdy qutqarýmen baılanysty materıaldyq shyǵyndardy talap etý máselesin qarastyrý qajet shyǵar», degen saýaldar qoıylýda. Árıne bul máseleniń óte kúrdeli ekendigi túsinikti. Siz durys aıtyp otyrsyz. Dáleldeý protsesi óte kúrdeli», - dep atap ótti V.Bojko óz kezeginde.
Osy rette L.Lepeha qar qursaýynda qalǵan azamattardy qutqarýǵa ketken shyǵyn bıýdjetke salmaq salatyn bolsa, onda azamattyq is júrgizýmen tártibimen shyǵyndy óndirý týraly sotqa júginýge bolatynyn aıtty.
«Bizdiń basty maqsatymyz jazalaý emes, qutqarý. Degenmen mundaı jaǵdaıǵa birneshe márte qasaqana túsetinder bolsa, onda qarastyrý qajet. Muny barlyq múddeli vedomstvolarmen kelisý kerek», - dep túıindedi sózin V.Bojko.
