Qazaqstanda boljamdy resýrstary bar 38 perspektıvaly ýchaske anyqtaldy
ASTANA. KAZINFORM – Qazaqstan geologııalyq barlaý jumystaryn aýqymdy júrgizip keledi. Tek 2025 jyldyń I toqsanynda mys, nıkel, kómir, altyn jáne sırek jer metaldarynyń boljamdy resýrstary bar 38 perspektıvaly ýchaske anyqtaldy. Bul týraly Úkimettiń baspasóz qyzmeti málim etti.
—Qazaqstan Prezıdentiniń tapsyrmasyna sáıkes, 2026 jylǵa qaraı elimiz aýmaǵynyń geologııalyq-geofızıkalyq zerttelýi 2,2 mln sharshy shaqyrymǵa jetýi tıis. 2024 jyly qamtý 2 014,4 myń sharshy shaqyrymdy qurady jáne jumystar belsendi qarqynmen jalǵasyp jatyr, — delingen habarlamada.
2025 jyldyń birinshi toqsanynda aýqymdy zertteýler: aerotúsirilimderdi deshıfrleý, marshrýttyq túsirilim, burǵylaý, sý jáne radıatsııa synamalaryn taldaý, geohımııalyq jáne kameraldyq zertteýler júrgizildi. Nátıjesinde paıdaly qazbalarynyń áleýeti joǵary 38 ýchaske anyqtaldy.
Boljamdy resýrstar qatarynda:
▪️2,6 mln tonna sırek jer metaldary,
▪️1,1 mlrd tonna qońyr kómir,
▪️3,7 mln tonna mys jáne nıkel,
▪️19 tonna altyn bar.
2024-2026 jyldary geologııalyq barlaý jumystaryna 22,83 mlrd teńge bólindi, onyń ishinde 2025 jyly 7,636 mlrd teńge ıgeriledi. 1:200 000 masshtabtaǵy: 14 tereń geokartalaý, 9 mıneragendik jáne 19 gıdrogeologııalyq jete zertteý obektileri boıynsha óńirlik jobalar jalǵasady.
Jeke ınvestıtsııalar mańyzdy ról atqarady. 2018 jyldan 2024 jylǵa deıin geologııalyq barlaýǵa 424 mlrd teńge salyndy, 2025 jyly 106 mlrd teńgege deıin ósedi dep kútilýde. Jumys kólemi boıynsha mindettemelersiz, biraq mindetti eseptilikpen jer qoınaýyn zertteýge arnalǵan jeńildetilgen lıtsenzııa naryqty ınvestorlar úshin qoljetimdi etedi.
Aıta keteıik, Qazaqstan sırek jer elementteri boıynsha álemdik ondyqqa kirýi múmkin.