Qazaqstanda bolý erejelerin buzǵan 7,5 myńnan astam sheteldik anyqtaldy - ІІM
ASTANA. QazAqparat - Qazaqstanda turý erejelerin buzǵan 7 572 shetel azamaty anyqtaldy, dep habarlaıdy QazAqparat QR ІІM baspasóz qyzmetine silteme jasap.
«Osy jyldyń 16 qańtarynan bastap 20 qańtaryna deıin Qazaqstan aýmaǵynda úshinshi el sanatyndaǵy mıgranttardyń zańsyz kóshi-qonyn anyqtaý jáne boldyrmaý, zańsyz kóshi-qon arnalaryn uıymdastyrýshylardyń is-áreketterin shekteý maqsatynda «Mıgrant» jedel aldyn-alý is-sharasy ótkizildi. Sonyń nátıjesinde Qazaqstan Respýblıkasynda bolý erejelerin buzǵan 7 572 shetel azamaty anyqtaldy. Sot sheshimi boıynsha olardyń 703-i elden shyǵarylyp, 715 adam qabyldaý-taratý ortalyqtaryna ornalastyryldy», - delingen habarlamada.
Іshki ister mınıstrliginiń málimetteri boıynsha, sheteldik jumys kúshin tartý jáne paıdalaný erejelerin buzǵany úshin 253 jumys berýshi ákimshilik jaýapqa tartylǵan.
Naqtyraq aıtqanda, Atyraý oblystyq polıtsııa basqarmasynyń zańsyz kóshi-qonmen kúresý jónindegi arnaıy bóliminiń qyzmetkerleri aǵyndy sýlardy tazartý qurylystaryna qyzmet etetin óndiristik bazanyń aýmaǵynda zańsyz eńbekpen aınalysatyn Ózbekstan azamattaryn ustaǵan. Sheteldiktermen birge jumys berýshi de ákimshilik jaýapqa tartylyp otyr.
Mıgratsııalyq zańdardy buzǵany úshin aldyn-ala tergeýdiń biryńǵaı reestrinde 66 qylmystyq is tirkeldi.
Máselen, Shymkent polıtsııa departamentiniń zańsyz kóshi-qonǵa qarsy kúres jónindegi arnaıy bóliminiń qyzmetkerleri Qazaqstan Respýblıkasynyń memlekettik shekarasyn zańsyz kesip ótken Aýǵanstan azamatyn ustaǵan.
«Іzdeýde júrgen 32 qylmysker ustaldy. Onyń ishinde tórteýi TMD azamaty. Jalpy, mıgratsııalyq zańnamalardy buzǵany úshin 3 877 sheteldiktiń elimizde ýaqytsha bolý merzimi qysqartyldy», - dep tolyqtyrdy baspasóz qyzmetinen.
