Qazaqstanda bolǵan jer silkinisi saldarynan Shyńjań ÓQK-na 110 mln. astam ıýan kóleminde shyǵyn keltirildi

BEIJІŃ. 31 qańtar. QazAqparat - Qazaqstanda 28 qańtar kúni bolǵan 6,1 baldyq jer silkinisi Shyńjań óndiristik-qurylys korpýsynyń (ShÓQK) 8 myńnan astam qyzmetkeriniń múlkine shyǵyn keltirdi.

Dúleı apat saldarynan ShÓQK-na keltirilgen ekonomıkalyq shyǵyn 110 mıllıon ıýannan asty, dep habarlaıdy «Chjýnsın» saıtynan.

Jerasty dúmpýler saldarynan Qazaqstan shekarasyna jaqyn ornalasqan Shyńjań korpýsynyń 4-shi dıvızııasynyń ásirese 74,75,76 jáne 77 polktary kóp zardap shekti. Dúleı apat saldarynan turǵyn úı qurylystary, azamattyq ınjenerlik qurylystar, mal qoralary búlinip, qıraldy.

Aqparat boıynsha, ShÓQK-nyń 8075 qyzmetkeriniń múlkine shyǵyn keltirildi, 1091 baspana men 174 mal qorasy búlindi. Ekonomıkalyq shyǵyn 110 mıllıonnan astam ıýandy qurady.

Tórtinshi dıvızııanyń komandovanıesi dúleı apat saldarynan zardap shekkenderge shatyrlar, kıim-keshek, aıaq kıim jáne azyq-túlik usyndy. 2 mıllıon ıýan kólemindegi qosymsha qor quryldy. Qazirgi ýaqytta qalpyna keltirý jumystary júrgizilýde.