Qazaqstanda bolashaq pedagogtardyń psıhıkalyq densaýlyǵy jiti tekserilmek
ASTANA. 5 jeltoqsan. QazAqparat /Gúlmıra Alıakparova/ - Qazaqstannyń bilim jáne ǵylym mınıstrligi men densaýlyq saqtaý mınıstrligi bolashaq pedagogtardyń psıhıkalyq densaýlyqtaryn tekserýdiń standarttaryn ázirlemek.
«Keńestik dáýirdiń ózinde stýdent deniniń saýlyǵyn jáne bilim alýǵa jaramdyǵyn rastaıtyn anyqtama ótkizgendigi málim. Álemde keleńsiz úrdister bolyp jatqanyn bilesizder, tipti, pedagogtardyń arasynda adamı qarym-qatynastardyń sheginen shyǵyp jatqandary kezdesedi», - dedi búgin Astanada ótip jatqan «Muǵalimniń kásibı damýy: dástúrleri men ózgeristeri» atty halyqaralyq ǵylymı-tájirıbelik konferentsııasy barysynda jýrnalısterge bergen suhbatynda QR Bilim jáne ǵylym mınıstri Baqytjan Jumaǵulov.
«Bolashaq pedagog JOO-ǵa oqýǵa túsý úshin qujattardy jaı ǵana tapsyryp qoımaı, densaýlyq jaǵdaıyna jáne tárbıelik jumyspen aınalysý qabiletine jiti tekserýden ótýi tıis bolady. Ol belgili testilerden ótýi qajet», - dedi ol.
«Qazir biz densaýlyq saqtaý mınıstrligimen bul máseleni qarap, zerdeleıtin bolamyz», - dep jalǵastyrdy mınıstr.
B.Jumaǵulovtyń sózine qaraǵanda, qazir atalmysh problema búkil álemde ótkir tur. «Ushqyshtardy daıarlaǵan kezde, ol áýe keńistiginde salmaqsyzdyq kúıde adekvatty jaýap bere alatynyn tekseremiz de, balalarymyz ben nemerelerimizdi pedagogqa tapsyra otyryp, onyń psıhıkalyq densaýlyǵy qanshalyqty túzý ekendigin nege teksere almaımyz?!», - dep túıindedi mınıstr.
