Qazaqstanda blokpostardan fermerlerdiń kedergisiz ótýi qamtamasyz etiledi
«Memleket basshysynyń tapsyrmasyn oryndaý maqsatynda oblys ákimdikteri aýyl sharýashylyǵy taýarlaryn óndirýshilerdiń, aýyl sharýashylyǵy tehnıkasy men taýarlyq-materıaldyq zattardy jetkizýshilerdiń esh qıyndyqsyz qozǵalysyn qamtamasyz etý boıynsha tıisti algorıtmdi daıyndady. Oblys ákimdikteri óńir aýmaǵyndaǵy qozǵalysqa ruqsatnamany alýdyń elektrondyq portaldaryn ázirlep, iske qosty», - delingen mınıstrlik málimetinde.
Ruqsat alý úshin kásiporyn qyzmetkeriniń, kóliktiń derekterin jáne qozǵalys úshin negiz bolǵan málimetti kórsete otyryp, elektrondyq formatta ótinim beriledi.
«Atalǵan ótinimge elektrondyq formatta kásiporyn basshysy qol qoıady. Osy qujat elektrondyq bazaǵa engizilip, avtomatty túrde barlyq blokpostarǵa jetkiziledi, sondaı-aq blokpostardan ótýge ruqsat etiledi. Kóktemgi egis jumystaryn ýaqytyly júrgizýdiń mańyzdylyǵyn eskere otyryp, aýyl sharýashylyǵy taýralaryn óndirýshiler úshin «jasyl dáliz» qaǵıdaty boıynsha jeńildetilgen bólek tártipti bekitýdi usynamyz», - dep atap ótti Aýyl sharýashylyǵy mınıstrligi mamandary.
Ol úshin uıymdastyrylatyn jumystyń kelesi tártibin bekitý usynyldy:
1. Kóktemgi egis jumystaryn uıymdastyrý boıynsha árbir oblys pen aýdanda jedel shtab qurý;
2. Jedel shtab quramyna saladaǵa jaýapty oblys, aýdan ákiminiń orynbasaryn, QR AShM Memlekettik ınspektsııa komıteti men Veterınarııalyq baqylaý komıtetiniń aýmaqtyq ınspektsııalaryn, QR IIDM Kóliktik baqylaýdyń aýmaqtyq ınspektsııalaryn, ishki ister organdarynyń basshylyǵyn, densaýlyq saqtaý basqarmalarynyń ókilderin, halyqqa qyzmet kórsetý ortalyqtary ókilderin, sondaı-aq óńirlik kásipkerlik palatasy men Qazaqstan fermerler odaǵynyń mamandaryn engizý;
3. Jedel shtab otyrystary kún saıyn ótkizilýi tıis;
4. Jedel shtab aýdan aýmaǵyndaǵy aýyl sharýashylyǵy kásiporny basshylarynyń tizimin (jeke kýáliktegi málimetterdi belgileı otyryp) bekitip, bul derekter blokpostarǵa tapsyrylady;
5. Aýyl sharýashylyǵy kásiporyndary basshylary óziniń qyzmetkeriniń jeke kýáligindegi málimetterin, sondaı-aq tehnıkanyń, júk jáne jeńil kóliktiń málimetterin, qozǵalysqa sebep bolǵan jaǵdaıdy kórsete otyryp, belgilengen úlgidegi anyqtama jazady. Sonymen qatar, kásiporyn basshysy jumysshylardy barlyq qorǵanys zattarymen (medıtsınalyq maska men qolǵap jáne basqa da quraldar) qamtamasyz etýge kepildik berýi tıis. Іndet juqtyrý jaǵdaıy oryn alsa, medıtsına qyzmetkerlerin shaqyrtý men uıymdy karantınge jabý sekildi shuǵyl sharalar qabyldaýǵa mindetti bolady;
6. Blokpostardy kedergizi ótý úshin jeke kýálik pen kásiporyn basshysy qol qoıǵan anyqtama usynylady.
7. Jedel shtab kóktemgi egis jumystaryn júrgizýge baılanysty tehnıka bólshekterin, janar-jaǵarmaı, mıneraldy tyńaıtqysh, agrohımııa, veterınarlyq preparat jetkizýshileriniń, sondaı-aq notarıaldyq keńse men ózge de uıymdardyń tizimin bekitedi.