Qazaqstanda bilim salasyna jasandy ıntellektini engizý jónindegi jumys toby quryldy
ASTANA. KAZINFORM – QR Oqý-aǵartý mınıstrliginiń janynan bilim berý salasyna jasandy ıntellektini engizý jónindegi jumys toby quryldy, - dep habarlaıdy vedomstvonyń baspasóz qyzmeti.
Qazaqstanda Memleket basshysynyń orta, tehnıkalyq jáne kásiptik bilim berý júıesine jasandy ıntellekt elementterin engizý jónindegi tapsyrmasyna sáıkes aýqymdy tehnologııalyq transformatsııalaý júzege asyrylyp jatyr. Jumys tobynyń alǵashqy otyrysyn ótkizgen Oqý-aǵartý mınıstri Juldyz Súleımenova eksperttik qaýymdastyqpen otandyq IT mamandardyń EdTex salasyndaǵy ınnovatsııalyq sheshimderi men usynystaryn tyńdaýǵa ázir ekenin bildirdi.
- Memleket basshysy Qasym-Jomart Toqaevtyń bastamasymen elimizde alǵash ret qabyldanǵan «Jasandy ıntellekt týraly» zań tehnologııalyq damýdyń jańa kezeńin aıqyndaıdy. Jahandyq básekege qabiletti, ozyq oıly, bilimdi, jańashyl, adal azamat tárbıeleý úshin AI tehnologııalaryn bilim berý protsesine saýatty ári sapaly engizý - mınıstrliktiń kún tártibindegi mańyzdy máselelerdiń biri. Jasandy ıntellekt muǵalimniń artyq júktemesin azaıtý jáne oqý protsesin tıimdi uıymdastyrýy úshin kómekshi qural retinde qoldanylýy kerek, - dep atap ótti Juldyz Súleımenova.
Otyrysta jasandy ıntellektti oqý úderisine kezeń-kezeńmen engizý úshin etıkalyq standarttardy bekitý, normatıvtik bazany jetildirý, ınnovatsııalyq sheshimder arqyly bilim sapasyn arttyrý, AI júıelerine qoıylatyn tehnıkalyq talaptardy ázirleý boıynsha máseleler qaraldy.
Bilim salasyna jasandy ıntellektti engizý jónindegi jumys tobyna Májilis depýtaty, ekonomıkalyq reforma jáne óńirlik damý komıtetiniń hatshysy Ekaterına Smyshlıaeva jetekshi bolyp saılandy. Aldaǵy ýaqytta jumys tobynyń otyrysy turaqty túrde ótkiziletin bolady.
Buǵan deıin sarapshylar jasandy ıntellekt bilim berý salasyn qalaı ózgertip jatqanyn aıtqan edi.