Qazaqstanda bilim berý salasy jańaryp, JI tehnologııalary jappaı oqytylyp jatyr

ASTANA. KAZINFORM – Qazaqstanda Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn oryndaý aıasynda óńirlik bilim berý habyn qurý baǵytynda qarqyndy jumystar júrgizilýde.

Ǵylym jáne joǵary bilim mınıstri Saıasat Nurbektiń málimetinshe, búginde elimizde Ulybrıtanııa, AQSh, Ońtústik Koreıa jáne basqa da elderdiń jetekshi ýnıversıtetteriniń 24 fılıaly ashyldy. Bul qazaqstandyq jastarǵa shetelge shyqpaı-aq ozyq bilim alýǵa múmkindik berip otyr.

Bilim berýdi tehnologııalyq jańǵyrtýdyń negizgi elementi – aýqymy jaǵynan buryn-sońdy bolmaǵan AI-Sana baǵdarlamasy. Onyń maqsaty – stýdentterge jasandy ıntellekt tehnologııalaryn jappaı oqytý.

«Baǵdarlama júzege asyp jatqan bes aıdyń ishinde bizdiń stýdentter 119 jasandy ıntellekt agentin qurdy, taǵy 395-i ázirlenýde. Nátıjesinde 20 ýnıversıtette jasandy ıntellekt, mashınalyq oqytý jáne kıberqaýipsizdik salasynda 25 jańa bilim berý baǵdarlamasy ashyldy», – dedi mınıstr.

Tehnologııalyq egemendikti qamtamasyz etý úshin qýatty ınfraqurylym qurylýda. Onyń ishinde 42 PFlops ónimdiligi bar sýperkompıýterlik klaster bar. Jasandy ıntellekt boıynsha kýrstar elimizdiń barlyq joǵary oqý oryndarynda mindetti pánge aınaldy. Bul IT-mamandar men ǵylymı kásipkerlerdiń jańa býynyn daıarlaýǵa negiz qalaıdy.

«Eki jyl buryn biz Coursera korporatsııasymen kelisimge qol qoıdyq. Sonyń arqasynda 95 ýnıversıtet osy platformadaǵy kýrstarǵa tegin qol jetkizdi. Osy ýaqyt ishinde stýdentter 350 myńnan astam sertıfıkat alyp, 2,5 mln saǵatqa jýyq onlaın-kýrstardan ótti. Júıeli jumystyń arqasynda Qazaqstan bıyl bedeldi Coursera halyqaralyq syılyǵynyń laýreaty atandy», – dedi Saıasat Nurbek.

Aıta keteıik, bilim berý salasynda jasandy ıntellektini qoldanýdyń etıkalyq standarty bekitildi.