Qazaqstanda bilim alǵan 100-den astam kambodjalyq laýazymdy qyzmette júr — Hýn Manet
ASTANA. KAZINFORM — Qazaqstanda bilim alǵan 120-dan astam kambodjalyqtyń birqatary óz elinde gýbernator, memlekettik hatshy jáne basqa da jaýapty qyzmetterdi atqaryp júr. Bul týraly Kambodja Premer-mınıstri Hýn Manet Qazaqstan Prezıdentimen kelissózderde aıtty.
Kambodja Premer-mınıstri eki el arasyndaǵy mádenı-gýmanıtarlyq baılanystardyń aıryqsha sıpatyna nazar aýdardy.
— Kambodjanyń 120-dan asa stýdenti Qazaqstanda bilim aldy. Búginde olardyń kóbi provıntsııalarda gýbernator, memlekettik hatshy laýazymdarynda eńbek etýde. Sonymen qatar memlekettik organdarda jaýapty qyzmetter atqaryp júr. Bul elderimizdi ortaq tarıh pen halyqtarymyz arasyndaǵy tyǵyz qarym-qatynas baılanystyratynyn ańǵartady, — dedi Premer-mınıstr.
Hýn Manet Kambodja azyq-túlik qaýipsizdigi, aýyl sharýashylyǵy jáne óńdeý ónerkásibi salalarynda yqpaldastyqty jandandyrýǵa nıetti ekenin aıtty.
Taraptar joǵary deńgeıde júrgizilgen búgingi kelissózder elderimiz arasyndaǵy saýda-sattyq kólemin ulǵaıtyp, iskerlik barys-kelisti nyǵaıtýǵa jáne seriktestiń tyń baǵyttaryn jolǵa qoıýǵa yqpal etetinine senim bildirdi.
Aıta keteıik, búgin Aqordada Memleket basshysy Qasym-Jomart Toqaev Kambodja Koroldiginiń Premer-mınıstri Hýn Manetti qarsy aldy.
Prezıdent Qasym-Jomart Toqaev Kambodjany Qazaqstannyń Ońtústik-Shyǵys Azııadaǵy senimdi seriktesi dep atady.
Qos memleket energetıka jáne elektrondy úkimet salasynda yntymaqtastyqty keńeıtpek.
