Qazaqstanda bıznestiń teń jartysy áıelderdiń qolynda - zertteý
ASTANA. QazAqparat - 2019 jylǵy qańtar aıynyń sońynda júrgizilgen zertteýlerge sáıkes, áıelder basqaratyn jeke kásipkerlik sýbektileriniń sany 581,2 myńǵa, ıaǵnı bir jylda 3,6% artty, dep habarlaıdy QazAqparat Ranking.kz silteme jasap.
Onyń 485,2 myńy belsendi jumys isteıdi, bul kórsetkish ótken jylmen salystyrǵanda 10,7% kóbirek. Sonymen birge, názik jandar basqaratyn jeke kásipkerlik úlesi de 46,8% quraǵan.
QR Ulttyq ekonomıka mınıstrligi Statıstıka komıtetiniń derekterine sáıkes, 2018 jyldyń basynda áıelder basqaratyn shaǵyn jáne orta kásipkerlik sýbektileri 648,1 myń bolǵan nemese jalpy ShOB sýbektileriniń 42,1% quraǵan.
Óńirler arasynda áıelder basshylyq etetin shaǵyn jáne orta kásipkerlik sýbektileri boıynsha Qostanaı oblysy kósh bastap tur: 46,6% (30,4 myń). Ekinshi orynda Qaraǵandy oblysy tur - 46,3% (46,6 myń) jáne úshtikti Shyǵys Qazaqstan oblysy túıindeıdi - 45,5% (50,6 myń).
