Qazaqstanda bıznestegi áıelderdiń úlesi 60 paıyzdan asty
ASTANA. QazAqparat - Qazaqstandyq áıelderdiń bıznestegi úlesi 60 paıyzdan asady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda QR Parlamenti Májilisiniń depýtaty Aıgúl Soloveva aıtty.
«Qazaqstanda áıelderdiń kópshiligi qyzmet kórsetý, qonaq úı, saýda, aýylsharýashylyǵy, óńdeý ónerkásibi salasynda jumys istep júr. Bul úrdis sońǵy 5 jylda ózgergen joq. Atalǵan salalar Qazaqstan ekonomıkasynyń basym bóligin qamtıdy», - dedi A.Soloveva.
Onyń aıtýynsha, Qazaqstanda erler kóbine iri ónerkásip salasynda, atap aıtqanda, munaı-gaz, aýyr ónerkásip salasynda jumys isteıdi.
«Alaıda, sońǵy ýaqytta bul úrdis ózgere bastady. Mysal retinde «TeńizShevroıl», «Adjıp» kompanııalarynan alynǵan esepterge súıene otyryp, mynadaı máseleni aıta alamyn. Kompanııalar usynǵan 7 laýazymnyń 4-ine áıel adamdar laıyq bolyp tanylǵan. Sondyqtan, bul jerde másele kásibı biliktilikte bolsa kerek», - dep qorytyndylady depýtat.
