Qazaqstanda bızneste jumyspen qamtylǵandar sany 4,4 mln adamǵa ósti
ASTANA. KAZINFORM - Premer-mınıstrdiń orynbasary – ulttyq ekonomıka mınıstri Serik Jumanǵarın búgin «AMANAT» partııasy janyndaǵy Kásipkerlikti damytý jónindegi úılestirý keńesiniń keńeıtilgen otyrysynda sóz sóıledi, dep habarlaıdy Úkimettiń bapasóz qyzmeti.
Keńes ótken jylǵy qazanda qurylǵanan beri birinshi ret keńeıtilgen otyrys formatynda «AMANAT» partııasynyń tóraǵasy Erlan Qoshanovtyń qatysýymen ótkizildi.
Búginde shaǵyn jáne orta bıznestiń JІÓ-degi úlesi 40,5%-ǵa jetti, onyń 33%-y shaǵyn kásipkerlikke jáne 7,5%-y orta kásipkerlikke tıesili.
2026 jyldyń basyndaǵy málimet boıynsha elimizde 2,3 mln-nan astam kásiporyn jumys isteıdi. Bızneste jumyspen qamtylǵandar sany 4,4 mln adamǵa jetti, bul 2024 jylǵy deńgeıden 3,4%-ǵa joǵary.
Vıtse-premer otyrysqa qatysýshylardy bızneske baqylaý jáne ákimshilik júktemeni azaıtý jónindegi sharalar týraly habardar etti. Atap aıtqanda, málimetterdi avtomatty túrde alý jáne tekserý úshin JI jáne tsıfrlyq damý mınıstrligimen birlesip, retteýshi memlekettik organdardyń aqparattyq júıelerin «E-lıtsenzııalaý» memlekettik derekqorymen ıntegratsııalaý júrgizilip jatyr.
Negizgi qural «eGov Business» platformasynyń negizinde bıznestiń tsıfrlyq kartasy — kásipkerlerdi súıemeldeýdiń biryńǵaı taldamalyq jáne servıstik quraly engiziledi. Bul memleket pen bıznestiń ózara is-qımylynyń servıstik modeline kóshýge, memlekettik qoldaý sharalarynyń ataýlylyǵyn arttyrýǵa, retteýdiń ashyqtyǵyn qamtamasyz etýge jáne ákimshilik kedergilerdi azaıtýǵa múmkindik beredi.
Búgingi tańda ShOB-ty qarjylyq qoldaý úsh negizgi baǵyt boıynsha júzege asyrylady: paıyzdyq mólsherlemelerdi sýbsıdııalaý, «Órleý» jáne «Іsker aımaq» baǵdarlamalary arqyly jeńildikti qarjylandyrý, sondaı-aq «Damý» qory bazasynda kepildikter berý.
-2025 jyldyń qorytyndysy boıynsha jalpy somasy 365,7 mlrd teńgege 3 373 joba sýbsıdııalandy, 268,5 mlrd teńgege sýbsıdııa tólendi. Bıyl qarjylandyrý kólemin aıtarlyqtaı ulǵaıtý josparlanyp otyr, atap aıqanda: respýblıkalyq bıýdjet qarajaty esebinen – 200 mlrd teńgege, sondaı-aq bankterdiń qarajatyn tartý esebinen - 244 mlrd teńgege, — dep atap ótti vıtse-premer.
AÓK salasynda 2026 jyly qarjylandyrý kólemi 1 trln teńge deńgeıinde saqtaldy. Onyń ishinde 300 mlrd teńgeden astamy aýyl sharýashylyǵy tehnıkasynyń lızıngine jiberildi. Budan basqa, Mal sharýashylyǵyn damytýdyń keshendi jospary sheńberinde agrarshylarǵa jeńildetilgen kredıt berýge 374 mlrd teńge bólinedi.
Ónerkásiptik kásiporyndardy júıeli qoldaý jáne yntalandyrý úshin 2026 jyly «Báıterek» UIH Damý ınstıtýttary arqyly 329 mlrd teńge qarastyrylǵan.
Otyrys barysynda kásipkerler birqatar problemalyq máselelerdi aıtty. Saýda jelileri odaǵynyń ókili Elbegı Ábdıev áleýmettik mańyzy bar azyq-túlik taýarynyń tizbesin 19-dan 31-ge deıin kóbeıtý, bıznestiń naqty shyǵystary 20-23% kezinde shekti ústeme baǵany 15% deńgeıinde saqtaý, sondaı-aq QQS-ty 16%-ǵa deıin arttyrý saýda jelileri úshin kúrdeli jaǵdaı qalyptastyryp otyrǵanyn jetkizdi. Vıtse-premer ÁMAT tizbesiniń keńeıýi ýaqytsha sıpatqa ıe ekenin jáne ınflıatsııa turaqtanǵan saıyn tizbe bastapqy tizimge qaıtarylatynyn atap ótti.
Qazaqstandyq salyq konsýltanttary qaýymdastyǵynyń múshesi Aıjan Balakeshova Salyq kodeksiniń normalaryn qoldanýǵa baılanysty máselelerdi kóterdi. Qazaqstan ınvestorlar qaýymdastyǵynyń tóraǵasy Rýstam Júrsinov jeke ınvestıtsııalardyń ósýin yntalandyrý qajettigine, sondaı-aq zańǵa táýeldi aktilerdiń kúrdeliligine jáne saqtalyp otyrǵan bıýrokratııalyq rásimderge nazar aýdardy. Qazaqstandyq taýar óndirýshilerdiń tizilimin, ulttyq rejımnen alý tetikterin, naryqtaǵy kontrafaktilik ónimniń aınalymyn praktıkalyq qoldaný salasynda da ózekti máseleler kóterildi.
Osyǵan deıin elimizde óńdeý ónerkásibi 6% deńgeıinde ósýi yqtımal ekeni týraly jazdyq.
