Qazaqstanda bızneske nesıe berý salasyndaǵy kedergiler aıtyldy
«Shaǵyn jáne orta bıznesti damytý úshin mańyzdy talaptardyń biri – ol nesıelik resýrstarǵa qoljetimdik. Sońǵy jyldardyń statıstıkasyna qaraǵanda, shaǵyn jáne orta bızznesti (ShOB) bank tarapynan nesıelý birtindep tómendegeni baıqaldy. 2017 jyldan ShOB sýbektilerine arnalǵan banktik zaımdar 22 paıyzǵa qysqardy, 5 trln teńgeden 4,1 trln teńgege deıin. Sonymen qatar osy merzimde jeke tulǵalardy nesıelendirý 64 paıyzǵa ósti», - dedi M. Áshimbaev Qazaqstanda shaǵyn jáne orta kásipkerlikti damytý salasyndaǵy memlekettik saıasatty jáne quqyqtyq retteýdi jetildirý taqyrybyndaǵy Parlamenttik tyńdaýda.
Onyń aıtýynsha, kásipkerlikti jańa bastaǵandar men mıkrobızneske nesıe alý qıynǵa túsedi. Olardyń kóbinde kepildi múlik pen jetkilikti aınalym qarjysy bolmaıdy.
Bankter qaryz alýshylardyń osy sanatyn nesıeleýge asyqpaıdy, sebebi iri klıentterge ǵana ekpin qoıylǵan. Bul baǵytta bankterde óz múddesi bar, ıaǵnı táýekelder men tabystyń deńgeıin nazarǵa alyp otyr. Osy jaǵdaıda mıkrobıznes ıeleri jeke tulǵalar sııaqty jyldyq 20-25 paıyzben qarjy qaryzyn alýǵa májbúr bolady.
«Bıznesti memlekettik qoldaý tetikterin jetildirýdi jalǵastyrý kerek. Ásirese, aqparattyq-túsindirý bóligine nazar aýdarý qajet», - dedi Senat Tóraǵasy.
Zertteý málimetterinshe, kásipkerler kóbine ózine qajet konsýltatsııalardy almaıdy. Shaǵyn bıznes memlekettik qoldaý sharalary jaıynda bilmeı jatady.
«Osy oraıda biryńǵaı úılestirý ortalyǵy jáne aqparattyq portal kerek bolar, ıaǵnı kásipkerler «jalǵyz tereze» qaǵıdaty boıynsha kómek alar edi», - dedi M. Áshimbaev.