Qazaqstanda bıznesin jolǵa qoıǵysy keletin sheteldik kompanııalar qazaqstandyq qamtý máselesin de esten shyǵarmaǵandary jón - bıznes-forým
Óıtkeni, atalmysh tehnıkalar Qazaqstan aımaǵynda joqqa tán. Bul týraly búgin Qazaqstan-Avstrııa bıznes-forýmynda «Qazagrofınans» aktsıonerlik qoǵamynyń Basqarma tóraǵasy Dýlat Aıtjanov málim etti, dep habarlaıdy QazAqparat.
Onyń sózine qaraǵanda, atalmysh másele Qazaqstan úshin óte ózekti bolyp otyr. «Qazagrofınans» aktsıonerlik qoǵamy negizinen respýblıkalyq bıýdjet pen ulttyq qordyń esebinen qarjylandyrylady. Ulttyq qor esebinen Memleket basshysynyń tapsyrmasymen ótken jyly aýyl sharýashylyǵyn damytýǵa 1 mıllıard AQSh dollary bólingen bolatyn. «Qazagrofınans» atalmysh baǵdarlamany júzege asyratyn agentterdiń biri. Osyǵan qaraı qazir ulttyq qordan bólingen qarjy negizinde jańa óndiris oshaqtaryn ashý máselesi qolǵa alynyp otyr. Olardyń qatarynda taýarly- sút fermalaryn uıymdastyryp, jylyjaı keshenderi men qus fabrıkalarynyń jumysyn jolǵa qoıý sııaqty mindetter bar. Sonymen qatar, osy baǵytta aýyl sharýashylyǵy tehnıkalaryn qurastyrý men tamshylap sýarý tehnologııasyn ıgerýmiz kerek», dedi Basqarma tóraǵasy.
Onyń aıtýynsha, atalmysh mindetterdi júzege asyrýǵa qajetti tehnıkalyq quraldar Eýropa elderinen, naqtyraq aıtqanda Germanııadan ákelinedi. Sondyqtan jıynǵa qatysyp otyrǵan kásipkerlerge elimizde osy baǵyttaǵy mindetterdi júzege asyrýǵa kúsh salý qajet degen usynys bar. «Alaıda biz bul baǵyttaǵy jumystar barysynda qazaqstandyq qamtý máselesine basa nazar aýdaratyn bolamyz. Sondyqtan belgili bir jobany usynǵanda biz shyǵarylatyn, nemese qurastyrylatyn tehnıkanyń aýqymdy bóligin elimizde júzege asyrýdy usynamyz», dedi D.Aıtjanov.
