Qazaqstanda bıylǵy úzdik áleýmettik jobalar anyqtaldy
NUR-SULTAN. QazAqparat - Nur-Sultan qalasynda arnaıy komıssııanyń otyrysy ótti, onda «Qazaqstannyń úzdik áleýmettik jobalary» respýblıkalyq konkýrsynyń fınalyna shyqqan 14 joba anyqtaldy, dep habarlaıdy QazAqparat.
«Bıyl konkýrsqa qatysýǵa 224 ótinim kelip tústi,onyń ishinde óńirlik kezeń barysynda 57 joba tańdap alyndy. Alpysqa jýyq jobany qarap shyqqan komıssııa músheleri «Qazaqstannyń úzdik áleýmettik jobalary» respýblıkalyq kórmesiniń qatysýshylaryn anyqtady. Olardyń ishinde Almaty qalasynan 4 joba, Jambyl oblysynan 2 joba, Shymkent qalasynan, Pavlodar, Qostanaı, Almaty, Aqtóbe, Túrkistan, Batys Qazaqstan jáne Soltústik Qazaqstan oblystarynan 1 joba», - delingen Eńbek jáne halyqty áleýmettik qorǵaý mınıstrliginiń málimetinde.
«Komıssııa músheleri muqtaj azamattarǵa volonterlik kómek kórsetýge, múgedektigi bar adamdardy jańa daǵdylarǵa úıretýge jáne múgedek balalardy kútim jasaýǵa baǵyttalǵan jobalardy erekshe atap ótti. Sonymen qatar osy jyly óte qyzyqty ekologııalyq joba usynyldy. Іriktelgen 14 jobanyń árqaısysyn búkil el boıynsha iske asyrýǵa engizýge bolady dep senimmen aıta alamyz. Jyl saıyn bul konkýrs úlken tanymaldyqqa ıe bolyp, qatysýshylardyń sany ósip keledi. Munda múgedektigi bar adamdarmen jumys isteıtin ÚEU úlken ról atqarady. Eń bastysy, múgedektigi bar adamdardyń ózderi belsendi ómir súrip qana qoımaı, qıyn ómirlik jaǵdaıǵa tap bolǵan basqa adamdarǵa kómektesý úshin jumys isteıdi», – dedi komıssııa tóraǵasynyń orynbasary, «Eńbek resýrstaryn damytý ortalyǵy» AQ-nyń prezıdenti Tamara Dúısenova.
Konkýrs jeńimpazdaryn marapattaý rásimi aǵymdaǵy jylǵy 1 qarashada Nur-Sultan qalasyndaǵy Táýelsizdik saraıynda «Qazaqstannyń úzdik áleýmettik jobalary» respýblıkalyq kórmesinen keıin ótedi.
Konkýrsqa qatysýǵa 2013 jyldan 2019 jylǵa deıin 1 192 ótinim kelip túskenin, onyń ishinde 228 áleýmettik joba óńirlik deńgeıde jáne 19 respýblıkalyq deńgeıde jeńimpaz dep tanylǵanyn atap ótken jón.
