Qazaqstanda bıylǵy alǵashqy toqsanda ólim-jitim kórsetkishi azaıdy - QR DSÁDM

ASTANA. QazAqparat - 2015 jylǵy 1 toqsanda Qazaqstanda týberkýlezben syrqattaný 6,1 paıyzǵa azaıyp, 100 myń turǵynǵa shaqqanda 61,6 adamdy qurasa, ólim-jitim 10 paıyzǵa tómendep, 100 myń turǵynǵa shaqqanda 3,6 adam boldy, dep habarlady mzsr.gov.kz.

2014 jyly osy dertpen syrqattanýshylyq 2013 jylmen salystyrǵanda 9,5%, ólim-jitim kórsetkishi 16% tómendedi. Jalpy sońǵy 10 jylda elimizde týberkýlezben aýyratyndar 55%, ólim-jitim 77% azaıdy. Aıta ketetin jaıt, densaýlyq saqtaýdyń penıtentsıarlyq sektorynda da aýrý kórsetkishi 17,3% tómendep, 2013 jyly 100 myń turǵynǵa shaqqanda 965,8 bolsa, 2014 jyly tıisinshe 799-dy qurady. Týberkýlezdiń dárige tózimdi túrlerin ýaqytynda anyqtaý maqsatynda respýblıkanyń barlyq óńirlerinde BACTEC MGIT-960, Hain-test jáne G-Xpert sııaqty aýrýdy tez anyqtaıtyn ádister engizildi. Naýqastardy bakterıologııalyq zertteý algorıtmi ázirlenip, bekitildi. Týberkýlezge shaldyqqany alǵash anyqtalǵan naýqastardy emdeýdiń tıimdiligi 86,4% jetti. Al Dúnıejúzilik densaýlyq saqtaý uıymynyń (DDU) standarty 85% quraıdy. Elimizde sońǵy jyldary týberkýlezben aýyratyn naýqastardy áleýmettik qoldaý kólemi de arta tústi. 2014 jyly bul maqsatqa 553 mln. teńge bólindi. 2015 jylǵy 17-19 aqpanda QR Densaýlyq saqtaý jáne áleýmettik damý mınıstrliginiń bastamasymen Qazaqstandaǵy týberkýlezdi epıdemıologııalyq qadaǵalaý barysyn baǵalaý úshin DDU sarapshylary keldi. Sapar barysynda olar týberkýlezdi anyqtaý, dıagnostıkalaý jáne tirkeýdiń qoljetimdiligi men sapasyn baǵalady. Halyqaralyq sarapshylar respýblıkada bul salada baqylaý júıesi jolǵa qoıylyp, medıtsınalyq-sanıtarııalyq alǵashqy kómek deńgeıinde týberkýlezge shaldyǵýshylyqtyń jańa oqıǵalaryn anyqtaýda belsendi jumystar júrgiziletinin atap kórsetti. DDU saparshylary Qazaqstandaǵy týberkýlezdi esepke alýdyń aqparattyq júıesine shynaıy jáne sapaly degen baǵa berdi.