Qazaqstanda bıyl qandaı joldardyń qurylysy aıaqtalady

ASTANA. QazAqparat - Bıyl respýblıka boıynsha 280 shaqyrym joldyń qurylysy aıaqtalady. Oǵan qosa, taǵy 360 shaqyrym avtojolda kólik qozǵalysy ashylady, dep xabarlaıdy QazAqparat tilshisi.

"QazAvtoJol" ulttyq kompanııasynyń basshysy Ermek Qızatovtyń aıtýynsha, aǵymdaǵy jylda "Oral-Kamenka-Reseı shekarasy", "Qapshaǵaı-Taldyqorǵan", "Astana-Pavlodar" jáne "Pavlodar-ShQO shekarasy" joldary tapsyrylady.

"Kelesi jylda "Şýchınsk-Zerendi", "Taskesken-Baqty", Kókterek asýy, "Beıneý-Aqjigit" joldarynyń qurylysy aıaqtalady. 2020 jyly "Qostanaı-Qarabutaq", "Úsharal-Dostyq", "Merke-Burylbaıtal" jáne Astananyń ońtústik-batys aınalma jolyn, al 2021 jyly "Almaty-Óskemen" jáne "Aqtóbe-Atyraý" ýchaskelerin paıdalanýǵa beremiz degen jospar bar. Jalpy, 2018-2022 jyldar ishinde 4 700 shaqyrymǵa sozylatyn joldardy qalpyna keltirý sharalary josparlanǵan. Sondaı-aq 7 500 shaqyrymǵa kúrdeli jóndeý júrgiziledi", - dep atap kórsetti E.Qızatov.

Aıta keteıik, búgingi keńes kezinde QR Premer-Mınıstriniń birinshi orynbasary Asqar Mamın konteınerlik tranzıtti ózge elderde uıymdastyrý máselesine basa nazar aýdardy. QR Investıtsııalar jáne damý mınıstri Jeńis Qasymbek aýyl joldaryn jóndeýge qatysty josparlarmen bólisti. Al "Qazaqstan temir joly" ulttyq kompanııasy alǵash ret "aqyldy qoımany" iske qospaqshy.