Qazaqstanda bıyl elektrondyq vızany rásimdeý sharalary bastalady
«Bıyl birqatar elder úshin elektrondyq vızalardyń qanatqaqty jobalaryn engizýdi josparlap otyrmyz jáne osy memleketterdiń tizimi aıqyndaldy. Osy oraıda «Búrkit» júıesin jetildirý qajet bolady (júıeniń ákimshisi QR UQK). Atap aıtqanda, UQK óziniń júıesin jetildirýi úshin tıisti qarjy kólemi belgilenip, respýblıkalyq bıýdjettik komıssııa ony bekitti. Sondyqtan da bıyldan elektrondyq vızalardy rásimdeýdi bastaımyz», - dedi QR Syrtqy ister mınıstriniń birinshi orynbasary Muhtar Tileýberdi.
Bul rette ol elektrondyq vızalardy engizý «Tsıfrlyq Qazaqstan» memlekettik baǵdarlamasy aıasynda qarastyrylyp jatqanyn atap ótti. Osy baǵytta BAÁ men Estonııa tájirıbesi eskerilgen.
Budan buryn, QR Іshki ister mınıstri Qalmuhanbet Qasymov sheteldikterdiń Qazaqstanǵa saparlaý tártibin túsindirgen bolatyn.
«Qazir elimizde depýtattyq korpýstyń belsendi qatysýy jáne qoldaýy arqasynda jańa mıgratsııalyq saıasat qalyptasty, bul halyqaralyq standarttarǵa saı keledi. Sheteldik jumys kúshin tartý kvota berý tetigi arqyly júzege asady. Bul mamandar qurylys salasynda, ónerkásip, aýyl sharýashylyǵy jáne basqa da salalarda jumys isteıdi. Sonymen qatar zań boıynsha naqty ınvestıtsııalyq jobalardy iske asyrý úshin sheteldik kásibı jumysshylardy kvotasyz ári ruqsatsyz tartýǵa múmkindik bar. Ár memleket azamattarynyń elimizge kelý men tirkelý rásimi ártúrli. Qazaqstanǵa kirý úshin olardyń denine vıza kerek. 19 elmen jalpyazamattyq pasporttar boıynsha kelýdiń vızasyz tártibi týraly kelisim jasaldy. Olardyń qatarynda Eýrazııalyq ekonomıkalyq odaq elderi de bar. 45 eldiń azamattary 30 kúnge deıin vıza rásiminen jáne tirkelýden bosatylǵan», - dep naqtylady mınıstr.