Qazaqstanda bıyl 8 mln tonna bıdaıdy eksportqa shyǵarady

NUR-SULTAN. QazAqparat – Aýyl sharýashylyǵy mınıstri Saparhan Omarov bıdaı óndirýshiler men treıderlerge ishki naryqta bıdaıdyń baǵasyn qymbattatpaýǵa shaqyrdy, dep habarlaıdy QazAqparat tilshisi.

«Búgingi tańda elimizdegi bıdaı alqabynyń 99,5 paıyzy jınaldy. Jalpy bıdaıdyń kólemi 20 mln tonnaǵa jetti. Bizdiń boljamymyz boıynsha taza salmaqtaǵy bıdaı kólemi – 18,5 mln tonna bolady. Eksporttyq áleýet – 7-8 mln tonna», - dedi Saparhan Omarov OKQ-da ótken baspasóz máslıhatynda.

Bul rette eksportqa qandaı da bir kedergi keltirilýi múmkin be? Bul suraqqa jaýap bergen mınıstr qazir bıdaı ótkizýge bolatyndaı jaıly jaǵdaı qalyptasyp turǵanyn jetkizdi.

«Qazaqstanda da, Reseıde de bıdaı jaqsy shyqty. Biz aldaǵy ýaqytta bıdaı eksportyna eshqandaı shekteý engizgeli otyrǵan joqpyz. Sonymen qatar men ózimizdiń eldegi taýar óndirýshiler men treıderlerden ótinsem deımin: ishki naryqtaǵy baǵany qalyptastyrý máselesine baıyppen kelgen abzal. Sebebi ishki naryqtaǵy baǵanyń ósip ketýi, birinshiden naryqqa jaǵymsyz áser etedi. Ekinshiden osynyń saldarynan unnyń baǵasy qymbattaýy múmkin. Bul jaǵdaı odan bólek álemdik naryqta bizdiń bıdaıymyzdyń básekege qabilettiligin tómendetýi múmkin», - dedi ol.