Qazaqstanda bıyl 100-den asa bala sýǵa ketip kóz jumǵan
ASTANA. QazAqparat - QR ІІM TJ boıynsha Komıtet kúnniń ystyq bolýyna baılanysty qazaqstandyqtardy taǵy da sý aıdyndarynda saq bolýǵa shaqyrady, dep habarlaıdy «QazAqparat» HAA tilshisi.
Ótken aptada qutqarýshylar, polıtsııa qyzmetkerleri men eriktiler 786 patrýldik sholý men reıdterdi ótkizgen. Osynyń nátıjesinde 160 adam ákimshilik jaýapkershilikke tartylyp, demalýshylarǵa 25 myń kórnekti úgit materıaldary taratylǵan. Sý aıdyndarynda 72 eskertý jáne tyıym salý belgileri qoıylyp, 26 kórnekti stend ornatyldy. Qutqarýshylar jyl basynan beri 7 myń adamǵa júzýdi úıretti.
«Birlese atqarylǵan jumystarǵa qaramastan sý aıdyndarynda balalardyń qatysýmen bolatyn qaıǵyly jaǵdaılar tirkelip jatyr. Sýǵa túsý maýsymy bastalǵaly beri, ıaǵnı 2017 jyldyń 1 maýsymynan bastap 227 adam sýǵa batyp ketti. Onyń 79-y balalar. 395 adam qutqaryldy, olardyń 71-i balalar. Jyl basynan sý aıdyndaryna 280 adam tunshyǵyp mert boldy. Olardyń 103-i balalar. Sý aıdyndaryndaǵy qaıǵyly jaılarǵa eń aldymen jaraqtandyrylmaǵan oryndarda sýǵa túsý, balalardy qaraýsyz qaldyrý, sýǵa túse almaý jáne óz kúshin baǵalamaý, mas kúıde sýǵa túsý sebep bolyp otyr», - deıdi qutqarýshylar.
Qutqarýshylar turǵyndardy saq bolýǵa shaqyrady. Sý aıdyndary nemese demalýǵa arnalǵan jaǵalarda: narkotıkalyq nemese alkogoldik masań kúıde sýǵa túsýge, qaıyqtan, katerden t.s.s. jaraqtardan sýǵa sekirýge, tekserilmegen jáne jaraqtandyrylmaǵan jerde sýǵa súńgýge tyıym salynady.
Sonymen qatar, belgilengen aýmaqtan asyp júzýge de shekteý qoıylady. Júzýge arnalmaǵan jabdyqtarmen júzýge, qaıyqtarǵa jaqyndaýǵa tyrysýǵa, sý aıdyndaryn biteýge, sý jaǵasynda demalýshylardy jaraqattaýy múmkin qoqystardy tastap ketýge, jalǵan dabyl berýge bolmaıdy.
Sondaı-aq, balalardy eresektersiz sý aıdyndaryna jibermeýge keńes beriledi.
