Qazaqstanda bıtýmdy biryńǵaı satyp alý tetigi engiziledi

ASTANA. QazAqparat – Otandyq bıtým óndirisi jol qurylysyndaǵy qajet kólemdi qamtamasyz ete almaı otyr. Bul týraly Májilistegi Úkimet saǵatynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Bıtým týraly aıtatyn bolsaq, jobalyq-smetalyq qujattamaǵa sáıkes naqty qajetti kólem – jylyna 1,7 mln tonna. Bul kólemdi otandyq óndiris qamtamasyz ete almaı jatyr. Búginde otandyq úsh zaýyt jylyna 1 mln tonna kóleminde bıtým óndiredi», - dedi Q. Óskenbaev.

Onyń aıtýynsha, otandyq zaýyttarda bıtým óndirý resýrs ustaýshynyń («QazMunaıGaz» AQ) tapsyrysy boıynsha munaıdy qaıta óńdeý jolymen júzege asyrylady.

«Bıtým túrindegi daıyn ónimdi resýrs ustaýshy sońǵy tutynýshyǵa satady. Osy oraıda baǵa saıasatyn resýrs ustaýshy belgileıdi jáne retteıdi. Bıtýmdy ýaqtyly jetkizý jáne baǵanyń ósýine jol bermeý jónindegi máseleni sheshý maqsatynda «QazAvtoJol» ulttyq operatory tıisti kelisimshart jasaý arqyly bıtýmdy resýrs ustaýshydan biryńǵaı satyp alýdy qamtamasyz etetin bolady», - dedi vedomstvo basshysy.

Foto: kabar.kg