Qazaqstanda «Bishimbayev University» ashyla ma – mınıstrlik jaýaby

ASTANA. KAZINFORM – Áleýmettik jelide Tarazda «Bishimbayev University» ashylady degen aqparat tarady. Onda joǵary oqý ornyn sottalǵan eks-mınıstr Qýandyq Bıshimbaevtyń ákesi ashýdy josparlap otyrǵany habarlanǵan. Osy jaıtqa qatysty Ǵylym jáne joǵary bilim mınıstrligi túsinik berdi. 

Vedomstvonyń resmı ókili Oljas Berkinbaevtyń málimdeýinshe, Qazaqstan Respýblıkasynyń «Bilim týraly» Zańynyń 5-3-babyna sáıkes, kadrlar daıarlaý baǵyttary men oqytý nysandary boıynsha joǵary jáne joǵary oqý ornynan keıingi bilim berý salasynda bilim berý qyzmetimen aınalysý úshin zańdy tulǵalarǵa lıtsenzııa jáne (nemese) lıtsenzııaǵa qosymshany berý – ǵylym jáne joǵary bilim salasyndaǵy ýákiletti organnyń quzyretine kiredi. 

Osyǵan baılanysty, joǵary jáne joǵary oqý ornynan keıingi bilim berý salasyndaǵy kez kelgen bilim berý qyzmeti mindetti túrde lıtsenzııalanýǵa jatady.

Qazaqstan Respýblıkasynyń «Ruqsattar jáne habarlamalar týraly» Zańyna sáıkes, ruqsat berý nemese habarlama tártibi belgilengen qyzmetti nemese áreketterdi (operatsııalardy) jeke jáne zańdy tulǵalardyń tıisti ruqsat almaı nemese tıisti habarlamany jibermeı júzege asyrýyna jol berilmeıdi. 

– Joǵaryda aıtylǵandardy negizge ala otyryp, mınıstrlik «Bishimbayev University» ataýymen bilim berý qyzmetin júzege asyrýǵa lıtsenzııa berilgenin joqqa shyǵarady. Sondaı-aq «e-lıtsenzııalaý» aqparattyq júıesinde tıisti ótinimniń bolmaǵanyn habarlaıdy, - deıdi Oljas Berkinbaev. 

Birer kún buryn habarlaǵanymyzdaı Qazaqstanda eki joǵary oqý ornynyń ataýy ózgerdi. 

Eske sala keteıik, azamattyq nekede bolǵan áıelin óltirgeni úshin burynǵy sheneýnik Qýandyq Bıshimbaev 24 jylǵa sottaldy.