Qazaqstanda bırjalyq brokerlerge mindetti lıtsenzııalaý engiziledi
ASTANA. KAZINFORM — 2026 jylǵy 1 qańtardan bastap Qazaqstanda taýar bırjalarynyń brokerleri men klırıngtik ortalyqtarynyń qyzmetin mindetti lıtsenzııalaý engiziledi. Bul týraly Básekelestikti qorǵaý jáne damytý agenttiginiń baspasóz qyzmeti málim etti.
— Bul tetik bırja naryǵy qatysýshylarynyń ashyqtyǵyn, senimdiligin jáne adal nıettiligin arttyrýǵa, sondaı-aq bırjalyq saýdaǵa qatysýshy barlyq taraptardyń múddelerin qorǵaýǵa baǵyttalǵan, — delingen habarlamada.
2026 jyldyń basynda naryq qatysýshylarynyń tıisti lıtsenzııalarynyń bolmaýyna baılanysty bırjalyq saýdanyń toqtap qalý qaýpin boldyrmaý maqsatynda, Básekelestikti qorǵaý jáne damytý agenttigi taýar bırjalaryna bırjalyq saýda qatysýshylary arasynda túsindirý jumystaryn aldyn ala júrgizý qajettigin eske salady.
— Bırjalarǵa brokerler men klırıngtik ortalyqtardy lıtsenzııalaý merzimin eskere otyryp, bırjalyq taýarlardy satý (satyp alý) jónindegi ótinimderdi qabyldaý merzimderin durys aıqyndaý jáne bekitý usynylady, — dep jazdy agenttikten.
Agenttik naryq qatysýshylaryn lıtsenzııalaýǵa daıyndyq úderisin keıinge qaldyrmaýǵa shaqyrady. Ýaqtyly lıtsenzııa alý 2026 jyldyń basynan bastap bırjalyq saýdanyń úzdiksiz júrgizilýin qamtamasyz etýge múmkindik beredi.
BQDA óz tarapynan taýar bırjalary men naryq qatysýshylarynyń jańa talaptardy engizýge daıyndyǵyn monıtorıngteýdi jalǵastyryp, qajetti ádistemelik kómek kórsetedi.
Eske sala keteıik, buǵan deıin Prezıdent Básekelestikti qorǵaý jáne damytý agenttiginiń ókilettigin keńeıtkenin jazǵan bolatynbyz.