Qazaqstanda biryńǵaı izdeý qozǵalysy qurylady
PAVLODAR. QazAqparat - Pavlodarda ótken «IZDEU-POISK-2018» birinshi halyqaralyq forýmynyń qorytyndy otyrysynda Qazaqstannyń barlyq izdeý jasaqtaryn biriktirý týraly sheshim qabyldandy, dep habarlaıdy pavlodarnews.kz.
Oǵan Reseı, Ýkraına, Belarýs, Estonııa, Moldova men Qazaqstannyń túkpir-túkpirinen kelgen izdeýshiler, tarıhshylar men ǵalymdar qatysyp, áıgili general Ivan Panfılovtyń nemereleri Alýa men Álııa Baıqadamovalar shaqyryldy.
Onda izdeýshilerdiń arnaıy jumys toby qurylyp, onyń quramyna respýblıkadaǵy barlyq izdeý uıymdarynan bir-birden ókil, sondaı-aq Astana, Almaty jáne Pavlodardyń belgili ǵalymdary men tarıhshylary kirdi.
Forýmǵa qatysýshylar úsh topqa bólindi. Іzdeýshiler jasaǵan jumystaryn talqyǵa salsa, tarıhshylar men arhıv qyzmetkerleri qujattardyń saqtalýy jaıynda sóz qozǵady. Qalǵan qatysýshylar Uly Otan soǵysy týraly aqparattardy zerdeleýge kiristi.
Pavlodar oblysy ákiminiń orynbasary Meıram Begentaev, qatysýshylarǵa alǵys bildirdi. «Pavlodar oblysy Qazaqstandaǵy izdeýshiler qozǵalysynyń ortalyǵy bolyp tabylady. Ertis óńiri izdeýshileriniń belsendiligimen Reseı óńirinde Uly Otan soǵysy ardagerleriniń 23 eskertkishi qaıta jańǵyrtylyp, boı kóterdi», - dep atap ótti Meıram Begentaev.
Máskeý oblysy izdeý jasaǵynyń komandıri Pavel Matveevtiń aıtýynsha, forýmda tájirıbemen almasý - erteńgi jumystyń jarqyn nátıjesi bolmaq. «Men 18 jyl boıy izdeý jasaǵyndamyn, Otbasymda eki atam da soǵystan aman keldi, biri Berlınge deıin barsa, ekinshisi kontslagerde bolǵan. Ýaqyt óte kele qandy maıdannan oralmaı qalǵan adamdardy izdege bel býdym. Mundaı forýmdardy jıirek ótkizgen durys. Munda ǵalymdar men tarıhshylar keledi, olarmen tájirıbe almasý asa paıdaly. Sebebi, tarıhı derektersiz izdeý jumystary nátıje bermeıdi», - deıdi ol.
Aıta keteıik, TMD izdeýshileri arasynda osyndaı formattaǵy kezdesý alǵashqy ret uıymdastyryldy.
