Qazaqstanda birneshe salada iri eriktiler uıymdary paıda bolýy múmkin
«Májilistegi «Nur Otan» fraktsııasy senatorlarmen birlese «Volonterlyq qyzmet týraly» zań jobasy daıarlandy. Negizgi maqsat - eriktilik qyzmetti iske asyrý úderisinde týyndaıtyn quqyqtyq qatynastardy tıimdirek retteý», - dedi depýtat.
«Nur Otan» partııasynyń «Jas Otan» jastar qanatynyń basshysy Nurlan Sydyqovtyń sózine qaraǵanda, búginde eriktilerdiń jumysyn zańdastyrý men júıelendirý sarapshylyq toptyń talqylaýyna shyǵarylyp otyr. Negizinen, álemdik tájirıbe boıynsha kóptegen elderde eriktiler máselesi zańdastyrylǵan.
«Birinshiden, bul adamdy yntalandyratyn, volonterlyqpen kóbirek aınalysýyna septigin tıgizetin tetik bolyp esepteledi. Meniń oıymsha, bul salany mindetti túrde zańdastyrý qajet»,- dedi N.Sydyqov.
Onyń paıymynsha, tótenshe jaǵdaılar kezinde nemese basqa da salalar boıynsha jedel áreket etýge qaýqarly arnaıy uıym qajettilik etedi.
«Bul úkimettik emes, ıaǵnı qoǵamdyq sala bolyp tabylady. Osy turǵyda bir nemese birneshe uıymnyń qurylýyn ýaqyt kórsetedi. Meniń oıymsha, bul básekelestik sala. Halyqaralyq tájirıbege súıenetin bolsaq, búginde AQSh-ta, Eýropa elderinde birneshe úlken uıymdar ózderiniń jumystaryn iske asyryp otyr. Sondyqtan bir uıymmen ǵana shektelýdiń qajeti joq. Osy baǵytta olardy salalap, bólý kerek», - dedi jastar qanatynyń basshysy.
Osy oraıda ol tótenshe jaǵdaılarda, bilim salasynda, kásipkerlikte jáne basqa da baǵyttarda eriktilik úlken kómek bolýy múmkin ekenin atap ótti. Sydyqovtyń aıtýynsha, ár salada óz uıymy bolsa, olardyń biliktiligi joǵary deńgeıge shyǵady.
«Kóptegen elderde eriktilerdiń jelisi bireýge kómek qolyn sozý ǵana emes, sonymen qatar ulttyq ıdeıa retinde kórsetilgen. Máselen, elimizde asarlatyp qoldaý kórsetý ejelden kele jatyr. Osy tusta biz bul salany zańdastyryp, jańa deńgeıge shyǵýymyz kerek», - dedi ol.
