Qazaqstanda birqatar JOO satylymǵa shyǵaryldy

ALMATY. QazAqparat - Qazaqstanda birqatar JOO jekemenshikke berilýi múmkin. QR Qarjy mınıstrligi birneshe joǵarǵy oqý ornyn satylymǵa shyǵardy, dep habarlaıdy QazAqparat tilshisi.

Aýktsıon 2019 jyly 7 naýryzda ótedi. Bul kúni aǵylshyn tásilimen, ıaǵnı baǵanyń joǵarylaýymen bássaýda ótedi. Eń joǵarǵy baǵany usynǵan tulǵa jeńimpaz atanady.

Satylymǵa Abylaı han atyndaǵy Qazaq halyqaralyq qatynastar jáne shet tilderi ýnıversıteti, O.Baıqońyrov atyndaǵy Jezqazǵan ýnıversıteti, Qazaq bas sáýlet qurylys akademııasy, Almaty energetıka jáne baılanys ýnıversıteti shyǵaryldy.

Barlyq nysandardyń 35%-y satylymǵa qoıylǵan.

Bastapqy baǵalary ártúrli. Abylaı han atyndaǵy Qazaq halyqaralyq qatynastar jáne shet tilderi ýnıversıteti bastapqy baǵamen 1 711 278 931,00 teńgege shyǵarylyp jatyr. Kepildik salymy - 75 750 000,00 teńge. Ótinimder 7 naýryzda tańǵy 8-den qabyldanady.

O.Baıqońyrov atyndaǵy Jezqazǵan ýnıversıtetiniń saýdasy 336 396 978,00 teńgemen shyǵarylyp jatyr.

Qazaq bas sáýlet qurylys akademııasynyń bastapqy baǵasy - 2 522 061 695,00 teńge, Almaty energetıka jáne baılanys ýnıversıteti - 1 401 617 089,00 teńgege baǵalanyp otyr.

Sonymen qatar Respýblıkalyq sý sporty sheberligi mektebi 331 060 000,00 teńgemen satylymǵa shyǵaryldy.

Nysan elektrondy tender boıynsha satylady. Bul jaǵdaıda qatysýshylar ózderi qalaǵan baǵalaryn usynys retinde elektrondy konvertke salyp, reestrdiń memlekettik veb-paraqshasyna qoıady.

Tolyq aqparatty gosreestr.kz saıtynan alýǵa bolady.