Qazaqstanda birqatar ken oryndarynyń qorlary eselep artty

ASTANA. QazAqparat - Sońǵy on jyldan elimizge tartylǵan ınvestıtsııanyń jartysynan astamy taý-ken jáne munaı-gaz sektoryna baǵyttaldy. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek málim etti.

«Sońǵy 10 jylda elimizge 230 mlrd. AQSh dollarynan astam ınvestıtsııa tartyldy. Onyń 60 paıyzdan astamy, ıaǵnı 132,6 mlrd. dollary  taý-ken jáne munaı-gaz sektoryna baǵyttaldy»,-dedi mınıstr.

Onyń sózine qaraǵanda, elimizdiń qazirgi  geologııalyq áleýeti negizinen keńestik kezeńde perspektıvaly aýmaqtardaǵy júıeli túrde geologııalyq zertteýlerdiń arqasynda qalyptasty. Qazirgi ýaqytta 90 paıyzdan astam ashyq ken oryndaryn jeke ınvestorlar ıgerýde.  Qazaqstanda jer qoınaýyn paıdalaný boıynsha 866 kelisimshart qoldanysta (keńinen taralǵan paıdaly qazbalarsyz), sonyń ishinde qatty paıdaly qazbalar boıynsha - 484, kómirsýtekti shıkizat -214, jerasty sýlary boıynsha -168.

«Osy ken oryndarynyń barlyǵy memleketke kiris ákelip, halyqty jumyspen qamtýǵa múmkindik berip otyr. Keleshektegi maqsatymyz jańa perspektıvaly ken oryndaryn ashýǵa negizdelgen. Qazaqstan Táýelsizdiginiń 25 jylynda jańa ken oryndaryn ashý baǵytynda kóptegen jumystar atqardy.Táýelsizdik jyldary buryn zerttelgen alańdarda ınvestorlarmen júıeli jumystyń nátıjesinde mynadaı ken oryndaryna barlaý júrgizilip, alǵash ret memlekettik balansqa qoıyldy: 119 kómirsýtekti shıkizat, 94 altyn, 14 mys, 19 marganets keni, 16 temir keni jáne 4 polımetal ken orny»,-dedi J. Qasymbek.

Onyń aıtýynsha, buryn zerttelgen ken oryndarynyń shıkizat qory kóbeıdi. Aqmola oblysyndaǵy Vasılkovsk jáne taǵy birqatar ken oryndarynyń qorlary eselep arta tústi.