Qazaqstanda birqatar eldiń áskerıleri bilim alyp jatyr
ASTANA. QazAqparat - Táýelsizdik jyldarynda 6 myńǵa jýyq Qazaqstan áskerıleri shetelde bilim aldy. Bul týraly Parlament Májilisinde áskerı bilim berýdi damytý taqyrybyndaǵy Úkimet saǵatynda palatanyń Halyqaralyq ister, qorǵanys jáne qaýipsizdik komıtetiniń tóraǵasy Muhtar Erman málim etti, dep habarlaıdy QazAqparat.
«Halyqaralyq yntymaqtastyqqa toqtalsaq, Táýelsizdik jyldarynda 12 elde 5963 áskerı qyzmetshi bilim alyp, olar Reseı, Belarýs, AQSh, Eýropa jáne Azııa elderinde biliktilik shyńdady. Ulttyq qorǵanys ýnıversıtetiniń magıstranttary men doktoranttarynyń shetelde tájirıbeden ótýi óziniń tıimdiligin kórsetti», - dep toqtaldy depýtat.
Onyń sózine qaraǵanda, elimizde Armenııadan, Tájikstannan jáne Qyrǵyzstannan kýrsanttar oqyp jatyr. Belgili bolǵandaı, olar Ulttyq qorǵanys ýnıversıteti, Qurlyq áskerleriniń áskerı ınstıtýty, Áýe qorǵanysy kúshteri áskerı ınstıtýty, Radıoelektronıka jáne baılanys áskerı ınjenerlik ınstıtýtynda bilim alýda.
Budan bólek M. Erman álemdik tájirıbege toqtala kele, áskerı is-qımyldyń bir túri edáýir dárejede aqparattyq salaǵa qatysty ekenin atap ótti.
«Sondyqtan kıbersoǵys jaǵdaıynda taktıka men ádisti ózgertýdiń mańyzdylyǵy artady. Osyǵan baılanysty, qazirgi kezde áskerı mamandardy daıarlaýda ǵylymı-ádistemelik qamtamasyz etý maqsatynda tsıfrlandyrýdy engizip, bilim berý resýrstaryn elektrondyq túrge kóshirý, elektrondy oqý materıaldaryn ázirleý, taktıkalyq daıyndyq, áskerı is-qımyldy, tehnıkalardy basqarýda tsıfrly trenajerlardy qoldaný qajet. Birinshi kezekte osy tehnologııalardy qoldanýdy biletin oqytýshylar men nusqaýshylardy daıyndaý kerek», - dep naqtylady depýtat.
