Qazaqstanda birqatar bank operatsııalary baqylaýǵa alynady

ASTANA. QazAqparat - Qazaqstannan aqshany  áketý  belgileri  bar valıýtalyq  operatsııalardyń  tizbesi  belgilendi. Bul týraly búgin Úkimettiń selektorlyq rejimdegi otyrysynda QR Ulttyq banki tóraǵasy Danııar Aqyshev málim etti, dep habarlaıdy QazAqparat.

Otyrysta valıýtalyq retteý jáne valıýtalyq baqylaý týraly zańnamany jetildirý máselesi jóninde baıandama jasaǵan ol elimizden aqshany  áketý  belgileri  bar valıýtalyq  operatsııalardyń  tizbesi  belgilengenin aıtty.

«Birinshi - rezıdenttiń  Qazaqstandaǵy  shottarǵa  aqsha  aýdarý jolymen óteýdi kózdemeıtin qarjylaı qaryzdy  beırezıdentke  berýi. Ekinshi - beırezıdenttiń  Qazaqstandaǵy  shottarǵa aqsha aýdarýdy  kózdemeıtin qarjylaı qaryzdy  rezıdentke  berýi. Úshinshi - rezıdenttiń úlestes emes beırezıdentke 720 kúnnen  asatyn  merzimge  paıyzsyz qarjylaı qaryzdy  berýi.  Tórtinshi - repatrıatsııalaý merzimi 720 kúnnen asatyn eksportqa nemese ımportqa aqy tóleý boıynsha operatsııalar»,-  dedi Danııar Aqyshev.

Onyń aıtýynsha, bankter mundaı operatsııalardy rezıdent  aqparatty valıýtalyq  baqylaý  organdaryna  berýge  ruqsat  jasaǵan kezde  ǵana  júzege asyrady.

«Oǵan qosa, zań jobasynda bank qupııasy bar  valıýtalyq operatsııalar boıynsha aqparatty Memlekettik  kirister komıtetine  berý quqyǵy kózdelgen», - dedi Ulttyq bank tóraǵasy.