Qazaqstanda birqatar azyq-túlikterdiń baǵasy qymbattady
ASTANA. QazAqparat - Qazaqstanda birqatar azyq-túlik taýary qunnyń artýy baıqaldy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Ulttyq ekonomıka mınıstrligi Statıstıka komıtetiniń tóraǵasy Álıhan Smaıylov málim etti.
«Tolyqtaı alǵanda, bizde jyl basynan beri baǵa 4,9 paıyzǵa kóterildi. Bul tutynýshylyq sebetin tolyqtaı alǵandaǵy jaıt. Al ózderińiz de biletindeı, tutynýshylyq sebetine azyq-túlik taýarlarymen qatar, azyq-túliktik emes taýarlar, aqyly qyzmetter kiredi. Degenmen, birqatar azyq-túlik taýary, birinshi kezekte jemis-jıekter men kókónisterdiń baǵasy basqa taýarlar men qyzmetterge qaraǵanda birshama qymbattady. Al keıbiri, máselen, qııar men qyzanaq baǵasy tómendedi», - dedi komıtet basshysy BAQ ókilderiniń saýalyna oraı.
Onyń atap ótýinshe, aǵymdaǵy jyldyń 7 aıynda respýblıkadaǵy ınflıatsııa 4,9 paıyzdy quraǵan.
«Sońǵy 7 aıdyń ishinde pııaz - 72, sábiz - 65, kartop - 45, qant - 22, qyzylsha - 21 paıyzǵa qymbattady», - dedi Á.Smaıylov.
