Qazaqstanda birinshi jáne ekinshi sanattaǵy joldyń úlesi 34% jetti
Ótken jyldyń qorytyndysyna sáıkes respýblıkalyq mańyzy bar avtomobıl joldarynyń 8,2 myń shaqyrymy búgingi tańda birinshi jáne ekinshi tehnıkalyq sanatqa jatqyzylǵan. 2025 jylǵa qaraı atalmysh kórsetkish Qazaqstandaǵy barlyq joldardyń 60% deıin jetkiziledi dep josparlanýda.
«Infraqurylymdy damytýǵa baǵyttalǵan «Nurly jol» baǵdarlamasynyń ótken besjyldyǵy avtomobıl joldarynyń 3 myńnan astam shaqyrymynyń qurylys jáne rekonstrýktsııalaý jumystarymen qamtylǵanymen este qaldy. Sondaı-aq, 2015 jáne 2019 jyldardyń aralyǵynda jolshylar respýblıkalyq mańyzǵa ıe joldardyń shamamen 7 myń shaqyrymy men jergilikti mańyzy bar joldardyń 15 myń shaqyrymyn jóndedi. Bul óz kezeginde el óńirleriniń qoljetimdiligin jaqsartýǵa múmkindik berip, aımaqtardyń áleýmettik-ekonomıkalyq damýyna serpin bergeni sózsiz» delingen habarlamada.
Tutastaı alǵanda, Qazaqstanda qozǵalys qarqyny táýligine 300 kólikten bastalatyn birinshi jáne ekinshi sanattaǵy joldardyń uzaqtyǵy ótken jyldardyń kórsetkishterimen salystyrǵanda 34% deıin jetkizildi. Jańa «Nurly jol» baǵdarlamasyna sáıkes, atalmysh kórsetkish bes jyldan keıin shamamen eki esege artpaq. Osylaısha, barlyq respýblıkalyq mańyzy bar avtomobıl joldarynyń jaǵdaıy jaqsy jáne qanaǵattandyrarlyq bolady dep josparlanǵan.
Eske salaıyq, búgingi tańda respýblıkalyq mańyzdaǵy avtomobıl joldarynyń 88% joǵaryda atalǵan sapa sanatynda. Sonymen qatar, 2025 jylǵa deıin oblystyq jáne aýdandyq mańyzǵa ıe joldardyń 27 myńnan astam shaqyrymy jóndeledi. Tıisinshe, jaqsy jáne qanaǵattandyrarlyq jaǵdaıdaǵy jergilikti joldar jelisiniń úlesi 95% deıin jetkizilmek.
