Qazaqstanda bir jylda azyq-túlik baǵasy 25 paıyzǵa qymbattaǵan
Azyq-túlik arasynda kókónis baǵasy aıtarlyqtaı ósken, jeltoqsanda qııar 35,6%, qyzanaq 14,6%, tátti burysh 8,4%, pııaz 7,9%, qyzylsha 3,8% qymbattady.
Qumsheker 3,8%, lımon 0,9% arzandady.
Azyq-túlikke jatpaıtyn taýarlardyń ishinde jeltoqsan aıynda tehnıka baǵasy aıtarlyqtaı joǵarylaǵan.
Máselen, 2022 jylǵy qarashamen salystyrǵanda symsyz qulaqqaptar – 7,7%, planshet – 6,3%, elektrli jylytqyshtar – 6,1%, noýtbýk – 3,7% qymbattady.
Ydys jýýǵa arnalǵan quraldardyń baǵasy 4,5%, kir jýǵysh untaqtiki 4% ósti.
Ótken aıda aqyly qyzmetterdiń baǵasy 0,5% ósti. Týrısterdiń medıtsınalyq saqtandyrý qyzmeti 7,3%, kólik jýý qyzmeti 3,8% qymbattady.
Kommýnaldyq qyzmetter boıynsha tarıfterdiń tómendeýi ortalyqtan jylytý (1 gKal) men ystyq sýǵa (1 m3) baıqaldy – árqaısysy 0,4%-dan.
Óńirler arasynda eń joǵary aılyq ınflıatsııa Qostanaı jáne Jambyl oblystarynda tirkeldi – árqaısysynda 1,9%-dan (respýblıkalyq ortasha deńgeıden 0,7 p.t. joǵary), eń tómeni Shymkent qalasy men Mańǵystaý oblysynda – árqaısysynda 0,7%-dan.
Óńirler bólinisinde azyq-túlik taýarlary Qostanaı jáne Jambyl oblystarynda eń kóp ósti – 2,5%-dan, azyq-túlikke jatpaıtyn taýarlar Qostanaı oblysynda – 2,2%, aqyly qyzmetter Jetisý oblysynda – 1,7%.
2022 jylǵy jeltoqsanda jyldyq mánde ınflıatsııa deńgeıi 20,3% qurady.
Azyq-túlik taýarlarynyń baǵasy 25,3%-ǵa, azyq-túlikke jatpaıtyn taýarlar 19,4%-ǵa, aqyly qyzmetter 14,1%-ǵa ósti.
2021 jylǵy jeltoqsanmen salystyrǵanda shaqpaq qant 92,7%, kir sabyn 87,6%-ǵa, keńse taýarlary 70,3% qymbattady.
Kerisinshe, jyldyq mánde suıytylǵan gaz (ballondarda) – 23%-ǵa, qyryqqabat 15,2%-ǵa arzandady.
2022 jylǵy qańtardan bastap tutyný baǵasynyń ındeksin jasaý kezinde azyq-túlik taýarlarynyń úlesi 40,7%, azyq-túlikke jatpaıtyn taýarlardyń úlesi 30,2%, aqyly qyzmetterdiki 29,1% quraıdy.
